Un hoben residente den e ciudad Mericano di Hagerstown (Maryland), a comparti riba rednan social, imagennan di e momento cu un intruso a drenta den su apartamento mientras cu e tabata bailando su so.
E hechonan a tuma luga e anochi di dia 22 di november, ora cu Hannah Vivirette tabata bailando y grabando su movimentonan cu su celular.
E apartamento di e hoben ta na di dos piso y e individuo a drenta via e porta di e balcon.
Riparando e presencia di e straño, Vivirette a puntra ken tabata eynan y a pidi pa e bay.
Como respuesta, e intruso “cu un sonrisa na su cara” a bisa na Spaño cu e tabata un “amigo”, Hannah a describi riba su cuenta di Facebook.
E hoben a sali for di e apartment y a pidi ayudo na un bisiña, mientras cu e intruso a huy.
Inicialmente, Hannah a publica e video riba e plataforma TikTok, unda cu e imagennan a wordo kita.
Vivirette a reconoce e homber, kende a resulta di ta un bisiña di e compleho residencial. Mas despues polis a gar’e y identifica como Angel Moises Rodriguez-Gomez, di 36 aña.
E sospechoso a sali den libertad bao di fiansa y a imput’e varios cargo, incluyendo robo, acoso y destruccion malicioso di propiedad.
