Entre e 12,096 musiconan cu a toca tabatin un sobrina di nos ciudadano Sra. Milagro Harms
Diasabra 13 di November centenares di fiyo, viola y otro instrument di cuerde a cuminsa nan ensayo riba e tereno enorme di Academia Militar di Venezuela na Caracas. Despues a join nan e instrumentonan di biento di palo, di metal y e instrumentonan di percussion, y prome cu nochi a cay, mas di 12 mil musico, mayoria di nan muchanan y adolescente, a toca cu un solo obhetivo: Logra e record Guinness di e orkesta mas grandi di mundo.
Nan a interpreta un pieza di Tchaikovsky di mas o menos 10 minut den aire liber bao di vigilancia di e supervisornan independiente cu tabatin e responsabilidad di verifica cu por lo menos 8907 instrumento tabata toca simultaneamente. Esaki tabata e rekisito pa kibra e record mundial.
Mas di 250 supervisor a vigila diferente grupo di musico pa sigura cu nan tabata toca segun e condicionnan di Guinness. Pa e musiconan logra un record nobo, e supervisornan mester a conta mas di 8907 musico tocando “Slavic March” di Tchaikovski hunto durante un periodo di cinco minut. E auditornan di KPMG di Venezuela lo controla e resultado. Segun KPMG e record mundial actual ta pertenece na un grupo Ruso cu a interpreta nan himno nacional. Den algun dia Guinness World Records lo anuncia oficialmente cu a establece un record nobo. Considerando cu tabatin mas di 12 mil musico, y pa kibra e rcord, menos di 9 mil musico mester a toca, ta obvio cu e musiconan Venezolano a establece un record nobo.
Pa yena e programa musical, ademas di “Slavic March”, e musiconan a toca “Venezuela” di Pablo Herrero y José Luis Armenteros, e himno nacional “Gloria al Bravo Pueblo” di Juan José Landaeta y “Alma Llanera” (considera como un himno no-oficial) di Pedro Gutierez.
“Slavic March” ta forma parti di e educacion musical di tur musico cu ta participa den e sistema di orkesta hubenil. E orkestanan a cuminsa ensaya dos luna pasa cu nan grupo regional den preparacion pa e concierto.
Tur e musiconan tabata miembro di un orkesta hubenil (un nucleo) di El Sistema. Maria Fernanda Coronado, sobrina di Milagro Harms, ta toca fiyo den e nucleo “Rafael Temóstenes Puche” di Los Puertos, Zulia desde cu e tabatin 5 aña.
Chiquinquirá Zavala, prima di Pedro Partido, ta toca cello y ta pertenece na e nucleo “Las Brisas” di e estado Carabobo.
Pa facilita e conteo cada musico a ricibi un bracelet numera y un asiento segun e instrument cu e ta toca. Nan tabata prohibi di comparti instrument. E director Enluis Montes a recorda e musiconan cu si un cuerde kibra no mester stop di toca, y si e partitura perde, sigi toca pa memoria.
Un otro condicion di Guinness ta cu un professional mester dirigi e orkesta y Andrés David Abreu, un famia di e fundador di El Sistema a wordo nombra. Segun Abreu, e 12 mil musiconan presente tabata un representacion chikito di e mas di un miyon mucha y hoben cu ta participa den El Sistema di Venezuela.
Na e momento cu nan a caba di toca “Slavic March” e musiconan a lanta nan instrument y mientras nan tabata zway un bandera Venezolano cu hopi orguyo, a laga los un grito di alegria: “La orquesta más grande del mundo!!”
Nos ta sigur cu dentro di poco aña LeerOrkest di Aruba lo por combina cu esunnan di Corsow, Bonaire y IslaRiba pa bira e orkesta mas grand di e region Caribense.
