Diadomingo 12 di juni e comunidad Filipino a celebra Dia di Independencia di Filipina. Den cuadro di esaki, e comunidad Filipino a organisa un ceremonia pa celebra e libertad cu e comunidad a lucha p’e. Prome Minister Evelyn Wever – Croes a hiba palabra na e ocasion, reconociendo e contribucion di Comunidad Felipino na Aruba y felicitando e grupo riba nan fecha di aniversario di independencia. 

Prome Minister a inicia su discurso reconociendo e diferente generacionnan di comunidad Filipino cu tin na Aruba. 

“Un grupo di ciudadano respectuoso, cu ta traha duro y cu ta sernan humano bunita, paden y pafo. Ademas, ta trata di un grupo di ciudadano cu a bandona nan famia, nan pas y nan cas, y a haci di Aruba nan hogar, estableciendo nan mes aki na Aruba y contribuyendo na Aruba su economia. Especialmente den sector di construccion y tambe den area di cuido medico. 

Den nomber di henter comunidad Arubano y Gobierno di Aruba, mi ta extende e mas sincero palabra di aprecio pa tur boso esfuerso, sacrificio y sosten brinda na henter nos comunidad. Aruba ta boso cas, leu for di cas. Y como lider Arubiano, manera Betico Croes a yega di bisa: Arubiano no ta solamente esnan cu a nace na Aruba. Arubiano ta tur esnan cu a bandona nan pais y haci Aruba nan cas.’ 


Premier Wever – Croes a termina haciendo uzo di e momento pa reconoce tur e personanan cu tabatin e curashi pa a lucha pa e libertad di Filipina. Ademas, a gradici henter e comunidad Filipino cu durante periodo di Covid tambe a traha duro y contribui, pa Aruba sali for di e crisis. “Aruba ta recuperando danki na tur cu ta biba aki na Aruba. Danki y Masha Pabien / ‘Pagbati’, Prome Minister a conclui. 

LEAVE A REPLY

Please enter your comment!
Please enter your name here