Poco dia pasa minister Geoffrey Wever a gaba den prensa cu Gobierno a aproba e maneho pa participacion y dividendo den companianan estatal, e asina yama “Deelnemingenbeleid y Dividendbeleid”. Wever a yame un momento sumamente importante pa gobernacion di Aruba. Di berdad gobierno di AVP Futuro ta haci algo historico, paso nunca antes tabata tin asina hopi persecucion politico y desicion contra tur regla di bon gobernacion ta tuma luga na Utilities, WEB, Elmar etc.
Geoffrey su coleganan Dowers y Baba cu tambe ta sinta na mesa cune pa tuma desicion, ta haciendo un desaster den tur compania di utilidad. Ta persigui directornan y comisarionan politicamente contra tur regla di bon gobernacion. Ta pusha hende dudoso y cuestional den posicion clave pa haci locual Dowers cu Baba cu AVP kier. Ni sentencia di Hues Geoffrey su coleganan Dowers cu Baba no ta respeta. No falta mucho pa nan bay mete cu trahadornan tambe cu Dowers y Baba no gusta. Anto tur esey ta pasa y Geoffrey cu ta gaba cu bon gobernacion ta keda keto, bira cara wak otro banda.
Geoffrey a lubida cu como minister di finansa e tambe tin cu controla y evita cu e persecucion politico di Dowers y Baba no bira extra gasto pa pueblo paga na awa y coriente mas caro. Ya caba e desaster di Dowers y Baba di bay contra desicion di Hues ta bira gasto extra di abogado y boet cu Hues a pone di 2500 florin pa dia pa cada un di e 15 comisarionan cu ta wordo persigui politicamente. Tur e gastonan extra aki pa WEB y Elmar etc ta bira prijs mas halto pa awa y coriente pa pueblo. Ya caba Geoffrey a hisa prijs di gas, awo e ta bay laga prijs di awa y coriente bira mas caro tambe djies pasobra Dowers y Baba tin sed di vengansa?
