ORANJESTAD- E siman aki a tuma luga e conferencia bi-anual AME – Aruba Meets Europe – completamente virtual.
E apertura a sosode diaranson mainta unda a habri e conferencia cu e Himno di Aruba. Despues e director di A.T.A. pa e mercado di Europa Sr. Tirso Tromp a dirigi palabra di bonbini na tur participante y a comparti entre otro e importancia di AME pa cu e mercado di turismo procedente di Europa y tambe a comparti un clip cu mensahenan clave di CEO di A.T.A. Ronella Tjin Asjoe-Croes, CMO di A.T.A. Sanju Luidens-Daryanani, CEO & President di AHATA Tisa LaSorte y CEO di Aruba Airport Authority Joost Meijs. Ademas e participantenan a wordo presenta diferente clip cu ta mustra bon cla tur e actualisacionnan/rekisitonan cu Aruba ta exigi di un bishitante prome cu nan yega nos isla pa disfruta di nan vacacion. Tambe e promocionnan nobo cu e mercado ta trahando riba dje actualmente. No obstante cu –debi na e pandemia– algun pais Europeo no ta permitiendo biahe pa esaki ta permiti na un manera limita, esaki no a stroba pa sigui produci y anticipa pa ora e fronteranan bolbe habri.
Despues a presenta e keynote speaker Nick Hall cu ta e fundador di e Digital Tourism Think Tank (DTTT) cu a comparti informacion valioso pa cu e asina yama Destination Transformacion pa e siguiente añanan den e ‘Normal Nobo’. Ademas a presenta un panel pa asina tur participante por haci nan preguntanan, cual moderador tawata e conocido Hulandes/Arubiano Curt Fortin y e panelistanan tawata consisti di: CEO di A.T.A. Ronella Tjin Asjoe-Croes, director di Caribbean Tourism Organization UK Carol Hay, Gerente General TUI Hulanda Arjan Kers y Director Commercial Benelux na Air France-KLM Daan Pijzel.
Un total di 497 persona a forma parti di e aperture di AME 2020.
KICO TA AME?
AME ta e conferencia bi-anual di turismo di Aruba dirigi riba e mercado Europeo. AME su obhetivo ta pa brinda posibilidad pa reforsa e conocimento di Aruba na e ehecutivonan y pa sigui traha riba e relacionnan cu e socionan, enfocando asina riba oportunidadnan cu por enrikece nos mercado turistico. Debi na e situacion actual, AME a wordo teni digital.
RECUPERACION DI NOS TURISMO
Durante su presentacion, Tjin Asjoe-Croes a laga sa cu e plan pa 2021 ta pa recupera e total di bishitantenan pa nos isla cu entre 45% pa 60% versus 2019 y mescos tambe pa loke ta trata e tourism credits, esta recupera entre cu 45% pa 60% versus 2019. Tambe pa loke ta turismo crucero ta e intencion pa recupera esaki cu entre 25% pa 50%. Pa cu e e Average Daily Rate intencion ta pa recupera 75% di locual a mira na 2019.
Tjin Asjoe-Croes a añadi cu algun aspectonan a resalta despues di e reapertura di nos fronteranan, e turista ta mustra satisfaccion cu e experiencia brinda pa Aruba. Loke tambe ta notabel ta cu e perfil di nos bishitantenan ta mas jong di loke ta custumber. Tambe cu tin mas cu ta bishitando Aruba pa prome biaha.
PARTICIPACION Y PREPARACION PA 2021
E siguiente dia, AME a presenta virtualmente su vitrina cual cu ta masha importante pa e negoshinanan por prepara pa 2021. Aki e operadornan di tour pero tambe representantenan di aerolineanan, hotelnan y otro comercio ta negosha pa loke por spera pa e siguiente aña. Entre e operadornan di tour por a nota presencia di entre otro di TUI (Hulanda y Alemania) – Webbeds – Expedia – Alidays (Italia) – ABC Travel (Hulanda) – Travelworld (Belgica) – Operador di Tour di Lithuania y ABC Inseln (Alemania) – ITG groep (Hulanda).
E aña aki tawatin mas cu 150 participante, entre otro di paisnan manera Hulanda, Belgica, Alemania, Inglatera, Italia, Suicia, Lithuania, Italia y España.
Aruba Tourism Authority ta gradici tur participante local cu nan tremendo participacion y contribucion pa un AME exitoso!
