Aruba a yega na un punto crucial di su desaroyo nacional, asina Dennerich Kelly a indica durante e conferencia di prensa semanal di fraccion AVP diamars mainta. E parlamentario a resalta cu e anuncio haci diasabra ultimo, referente na un plan conhunto entre Gobierno di Aruba y Gobierno Hulandes pa redestina e area di refineria na San Nicolas, ta marca un momento historico pa nos pueblo.
Kelly a enfatisa cu Aruba ta den un periodo di transicion importante, manera a priminti den e plan di gobernacion di Gabinete AVP/FUTURO. “Nos tin e curashi pa mira mas leu, pa eleva Aruba for di decadencia y hiba e pais riba caminda di resiliencia. E refineria, aunke ta un simbolo historico, por bira awor un simbolo di prosperidad nobo,” Kelly declara.
Na augustus ultimo parlamento a aproba un mocion cu a propone un redestinacion structural y sostenibel pa e tereno di refineria. Kelly a referi na esaki como un “buelta moral” den direccion di proteccion ecologico y innovacion tecno-economico.
Kelly a splica cu e desmantelacion di refineria mes ta un proyecto grandi, cu lo rekeri un inversion considerabel y planificacion serio. Sinembargo, danki na relacion actual solido cu Hulanda y cooperacion regional, Aruba a logra un acuerdo pa permiti e proceso di desmantelacion, limpieza di tereno contamina, y pa despues bay over na un destaho publico internacional pa yama inversion y idea nobo pa e zona.
“Esaki no a cay fo’i shelo,” Kelly sigui. “Ta parti di un vision cu AVP a papia di dje hopi tempo caba: un Aruba sostenibel, cu economia diversifica y cu infrastructura moderno. Ta ora pa berdaderamente nos crea un base pa e futuro generacionnan, presentando Aruba como un hub di innovacion y transicion energetico.”
Kelly tambe a indica cu preocupacion ta natural den un proceso manera esaki, y cu opinion di tanto e habitantenan di San Nicolas y bisindario como tambe di San Nicolas Business Association y otronan lo ta den consideracion. “Nos a tuma un decision grandi, pero tambe responsabel. E desaroyo no ta limita na San Nicolas solamente; e ta pa Aruba henter. E ta pa crea trabou digno, oportunidad real y un desaroyo cu por sostene su mes.” Parlamentario Kelly a finalisa cu un apelacion pa unidad nacional: “Laga nos mira esaki como un paso pa futuro. Aruba mester move hunto. E oportunidad ta aki, nos momento ta awor.”
