E topico di bienestar y dignidad di nos grandinan ta un prioridad pa Aruba. Den e contexto ey, Fraccion di AVP den Parlamento di Aruba a tene recientemente un reunion publico cu Minister di Asuntonan Social, Salud Publico y Cuido di Adulto Mayor y Adicto, Sra. Mervin Wyatt-Ras.
Durante e encuentro, e enfoke principal tabata riba e necesidad di sigui mehora e bienestar di nos grandinan y garantisa cu nan por biba cu dignidad. Fraccion di AVP a enfatisa cu un dialogo continuo y constructivo entre Gobierno, Parlamento y diferente stakeholders ta esencial pa yega na solucionnan real y duradero.
Minister Wyatt-Ras a tende cu atencion e señalnan y preocupacionnan presenta, specialmente esunnan cu ta bini directamente di nos grandinan. Den e marco di Gobierno AVP–Futuro, a tuma accionnan concreto, entre otro e decision pa duna remedi bek. E medida aki a wordo bon ricibi den comunidad, mirando cu e ta toca un y tur den pueblo. Hopi hende na Aruba tin nan mes of un famia cu a contribui structuralmente, pa hopi aña, na gasto di remedinan cu awor ta cubri atrobe pa AZV.
Ademas, Fraccion di AVP a destaca cu e aumento di pensioen cu Afl. 500 ta representa un paso importante pa alivia e presion financiero riba nos grandinan, specialmente den un periodo caminda costo di bida ta sigui subi mundialmente. Segun Fraccion di AVP, e medida aki ta mustra claramente cu e voz di pueblo ta wordo scucha y cu palabra ta bira accion.
Fraccion di AVP ta firme den su posicion cu nos grandinan merece solucionnan cu nan por sinti den nan bida diario. Asina mes cu tin hopi reto pendiente, e cuido di calidad pa nos grandinan ta mehora paso pa paso. E inversion den cuido ta grandi, pero necesario.
E meta ta cla: un Aruba caminda nos grandinan por biba cu trankilidad, siguridad y respet.
