Diabierna atardi, Prome Minister Mike Eman a tene un encuentro special na Cocolishi, caminda el a haci entrega oficial di plakaat di agradecimento na un grupo di NGO y organisacionnan cu, pa diferente motibo, no tabata presente durante e Common Good Conference y por lo tanto no a ricibi nan plakkaat e momento ey.
Cu e gesto aki, Prome Minister Eman a reafirma cu reconocimento y apreciacion pa trabou comunitario no ta limita na un solo momento, pero ta un compromiso continuo cu esnan cu ta contribui activamente na e bon comun riba Aruba.
Durante e encuentro, e NGOs y organisacionnan cu a ricibi nan plakkaat di agradecimento tabata:
- Centro di Bario Playa / Pabow
- Leerorkest
- Grupo Folklórico Venezuela
- Fundacion Rancho
- Funari
- Stichting Hunto
- FADA
- Rosea Cultural
- IBISA
- Plan di Bida
- Fundacion Smile Mobile
- UNESCO
- Centro di Bario Dakota
E plakkaatnan ta un simbolo di gratitud pa e dedicacion, perseverancia y impacto positivo cu e organisacionnan aki a tene den comunidad, hopi di nan durante añanan, y cu ta forma un pilar esencial di e base social di Aruba.
Prome Minister Eman a expresa su aprecio pa e trabou cu cada NGO ta haci riba diferente area, incluyendo bienestar social, cultura, educacion, salud, desaroyo comunitario y inclusion. Segun Premier Eman, e bon comun ta construi precisamente door di e esfuersonan consistente di e tipo di organisacionnan aki, cu ta traha cerca di hende y bario.
E encuentro na Cocolishi a crea un ambiente di dialogo y reconocimiento mutuo, marcando un clausura simbolico y digno di e proceso di agradecimento inicia durante e Common Good Conference, y na mes momento un apertura pa sigui fortalece colaboracion entre Gobierno y sociedad civil.
