Parlamentario Jennifer Arends-Reyes y presidente di comision di asuntonan di reino y relacionan exterior a pone enfasis riba e gran importancia di participacion di Aruba den e Interparlementair Koninkrijksoverleg (IPKO) cu lo tuma lugar na Aruba cuminsando diahuebs 19 di februari. Segun Sra. Arends-Reyes, IPKO ta un plataforma esencial unda parlamentonan di Aruba, Corsou, Sint Maarten y Hulanda ta bin hunto pa discuti temanan crucial pa futuro di paisnan den Reino.
“IPKO no ta solamente un reunion protocolar. E ta un espacio unda nos por defende interes di Aruba, pone nos preocupacionnan riba mesa y construi brugnan di cooperacion riba base di respet y igualdad,” asina Arends-Reyes a declara.
Segun parlamentario, pa Aruba IPKO tin un rol strategico. Den e reunionnan aki ta wordo trata asuntonan manera finansas publico, maneho di crisis, fortificacion di estado di derecho y desaroyo sostenibel. E ta subraya cu participacion activo ta esencial pa garantisa cu voz di Aruba ta scucha ora ta traha reglanan of acuerdo cu por tin impacto directo riba nos pueblo.
Sra Arends-Reyes tambe a mustra cu IPKO ta fortalece rol di parlamentonan como guardian di democracia. Dor di intercambio directo cu otro parlamentario den Reino, Aruba por comparti experiencia, siña di otro paisnan y busca solucionnan conhunto pa reto comun, manera cambio climatico, siguridad y stabilidad financiero.
Parlamentario Jennifer Arends-Reyes a conclui cu participacion serio den IPKO ta un inversion den futuro di Aruba.
“Cada biaha cu nos sinta na mesa di IPKO, nos mester sa cu nos ta representa pueblo di Aruba. Nos meta ta proteha interes nacional, fortalece nos posicion den Reino y traha pa un cooperacion cu ta beneficia nos comunidad awor y generacionnan cu ta bin.” Cu e mensahe aki, Arends-Reyes ta reafirma su compromiso pa sigui traha activamente pa un Reino basa riba respet mutuo y responsabilidad comparti.
