Dia 1 di april 2026, Staten a ricibi un presentacion di Coordinatiecentrum Mensenhandel y Mensensmokkel Aruba (CMMA). E presentacion aki a mustra cu Aruba tin un ekipo dedica, sra. Jeanette Baars y sra. Suekyen Croes cu ta haci un trabou hopi importante pa proteha nos pais y nos hendenan contra crimennan serio manera traficacion y contrabando di hende.
“Mensensmokkel” of contrabando di hende, ta un delito contra e pais. Ora un hende yuda otro hende drenta ilegalmente na Aruba, duna nan cas pa keda of trabou ilegalmente, esaki ta cay bou di “mensensmokkel” segun ley. Esaki por resulta den condena di te 18 anja di prison. CMMA a mustra cu nan tin hopi exito den e lucha contra e tipo di criminalidad aki.
“Mensenhandel” of trafico di hende, ta algo diferente y mas grave, pasobra esaki ta un delito contra e persona y contra derechonan humano. Esaki ta inclui situacionnan unda hende ta wordo trata manera esclavo, no ta wordo paga, ta wordo forza den prostitucion of trabou forsa. Esakinan no ta cosnan leu di nos; esaki ta pasa na Aruba tambe. Pesei ta hopi importante pa mas hende den nos comunidad conoce e problema aki y sa con nan por reconoce señalnan y denuncia situacionnan sospechoso.
Mi kier expresa mi aprecio profundo pa e trabou importante cu CMMA ta haci tur dia. Nan ta traha pa proteha esnan mas vulnerabelnan den nos comunidad y pa mantene Aruba un pais sigur y husto. E trabou aki no ta facil y ta pidi hopi dedicacion, balentia y perseverancia.
Semper mi a duna mi apoyo completo na CMMA, y p’esey mi a pidi pa Parlamento scucha nan. Apesar cu a tarda 4 luna pa e reunion wordo yama, mi ta contento cu porfin nos a logra. Mi ta desea CMMA hopi forsa y sabiduria den nan trabou importante. Nos tur tin un responsabilidad pa habri nos wowonan, pa no mira otro banda y pa yuda den e lucha contra traficacion y contrabando di hende. Hunto nos por haci diferencia.
