Consulado General di Merca na Corsou ta orguyoso di anuncia e grupo di aña 2026 pa e programa di beca “Young Leaders of the Americas Initiative” (YLAI) di Departamento di Estado di Merca. E aña aki, a selecciona cuater emprendedor hoben for di Corsou, Aruba y Sint Maarten pa participa den e prestigioso programa di intercambio aki.
Lansa na 2015, e Programa di Beca YLAI ta e iniciativa principal di Departamento di Estado di Merca pa duna poder na emprendedornan emergente y lidernan di negoshi den henter Hemisferio Occidental. E programa ta apoya innovacion, ta fortalece habilidadnan di liderazgo y ta promove crecemento economico pa medio di colaboracion y intercambio.
E Programa di Beca YLAI 2026 lo tuma lugar for di november 2025 te cu mei 2026, reuniendo aproximadamente 250 lider hoben for di henter e region.
E participantenan selecciona for di e islanan Hulandes den Caribe ta:
- Ishshah Carty – di Sint Maarten, den e industria di Cuminda y Bebida, liderando Indulgence.
- Najhilah Ten Meer – di Corsou, den e industria di Arte, Musica y Cultura, liderando Landish.
- Roxanne Rodriguez – di Aruba, den e area di Consulting di Maneho y Integracion di Sistemanan, liderando NotionFlows.
- Nathania Engelhardt – di Corsou, den Desaroyo Comunitario, liderando Debat.ED.
Cuminsando e weekend aki, e participantenan lo biaha pa Houston, Texas, pa un orientacion di apertura prome cu nan inicia nan pasantia profesional di cuater siman cerca empresanan y organisacionnan Mericano den diferente ciudad rond di Merca. Durante e programa, e participantenan lo colabora cu nan coleganan, participa den training di liderazgo y emprendemento, y forma parti di actividadnan di intercambio cultural. E programa lo conclui cu un Foro di Clausura na Washington, D.C.
Pa medio di experiencia practico, guia (mentorship) y oportunidadnan di networking, e participantenan lo bolbe nan pais respectivo cu habilidadnan mehora, un red profesional mas amplio y recursonan nobo pa haci nan proyectonan crece. E programa tambe ta fortalece e lasonan comercial entre Merca y e islanan Hulandes den Caribe, contribuyendo na e desaroyo economico regional a largo plaso.
Desde su lansamento, mas di 2,000 participante di YLAI a colabora cu mas di 1,250 organisacion Mericano. Hopi di e participantenan a reporta un aumento den acceso na recurso y crecemento den nan negoshi despues di e programa.
Pa mas informacion tocante e Programa di Beca YLAI y e Red di YLAI, por fabor bishita https://ylai.state.gov/. Sigue e programa riba social media via @YLAINetwork y uzando e hashtag #YLAI2026.
Pa informacion adicional, por fabor tuma contacto via CuracaoPAS@state.gov.
E Programa di Beca YLAI ta patrocina pa Departamento di Estado di Merca cu fondo suministra pa Gobierno di Merca, y ta wordo implementa den asociacion cu IREX.
