Aruba Conservation Foundation (ACF), como un organizacion independiente dedica na maneho di conservacion, recientemente ta anuncia e proyecto di ‘Aima Coa’. Un iniciativa den Parke Nacional Arikok pa restauracion ecologico lidera pa ACF hunto cu partnernan di conservacion y ciencia.
Como parti simbolico di e ceremonia, Prome Minister di Hulanda, Rob Jetten, y Prome Minister di Aruba. Mike Eman, a planta e prome cuater palonan nativo, den e area di restauracion, simbolo di un compromiso comparti pa recuperacion ecologico, resiliencia climatico y un futuro regenerativo pa e paisahenan di Aruba.
E nomber “Aima Coa”, deriva di idioma Caquetio, ta nifica “abundancia”, reflehando e vision di e proyecto pa restaura balansa ecologico entre tera, naturalesa y hende.
E proyecto ta enfoca riba restauracion di ecosistemanan seco degrada den e paisahenan seco di Aruba por medio di esfuersonan di restauracion a largo plazo. E area di restauracion ta cubri mas o menos 3 hectar y lo wordo cera completamente pa preveni presion di bestianan invasivo y domestico manera cabrito y asina crea e condicionan necesario pa e ecosistema por recupera naturalemente.
ACF lo implementa tanto restauracion pasivo como activo. E restauracion pasivo lo enfoca riba monitor di con naturalesa ta regenera naturalmente sin intervencion humano y restauracion activo ta encera cu e team di ACF lo activamente planta palo y mata nativo cu ta adapta miho den e habitat y asina acelera recuperacion ecologico.
E trabounan di restauracion ta inclui reduci presion di bestianan cu ta cana liber, elimina especienan invasivo, planta palo, mata y cadushi nativo, mehora retencion di suela y awa, y fortalece conectividad entre habitatnan natural pa sostene biodiversidad nativo.
Durante e lansamento tambe a presenta borchi interpretativo di restauracion, cu ta yuda bishitantenan compronde miho tanto e impacto historico cu a forma e paisahe di Aruba como e esfuersonan actual pa regenera esaki. E borchinan a wordo desaroya pa conta e historia di degradacion ambiental y vision di restauracion den un manera accesibel y educativo pa bishitantenan local y internacional.
Segun ACF, Aima Coa lo funciona como un sitio bibo pa recuperacion ecologico, monitoreo cientifico, educacion y futuro colaboracion den conservacion.
Ta spera cu den e siguiente dies aña, e area aki lo desaroya poco poco den un ecosistema di mondi seco mas saludabel y autosostenibel, contribuyendo na e resiliencia ambiental y metanan di conservacion di Aruba.
E lansamento ta forma parti di e esfuerzonan continuo di ACF pa proteha y restaura patrimonio natural di Aruba mientras fortalece e conexion entre hende y naturalesa.
ACF ta extende un danki grandi na cada ranger y colega cu a traha incansabelmente e ultimo simanann akinan pa trece e proyecto di Aima Coa na bida.Pa mas informacion tocante e proyecto di restauracion Aima Coa y esfuersonan di conservacion di Aruba, por email info@acf.aw of bishita www.acf.aw.
