No preocupa pa nada, ma den tur cos, pa medio di oracion y suplica cu gradicimento , laga boso peticion ta conoci dilanti di Dios. Y e pas di Dios,cu ta surpasa tur comprendemento,lo warda boso curason y boso mente den Cristo Hesus.( Filipensenan 4:6-7).
Bo peticion no tin nada di haci riba facebook.
Bo peticion no tin nada di haci riba whatsup.
No ta tur hende tin mester di sa bo drechi kico bo ta pasando aden.
Hopi biaha nos ta confia hende robes cu enbes di yuda ta brua e asunto.
Hopi biaha nos por confia hende cu ta haci cherche di nos.
Hopi biaha nos ta confia hende cu tabata desea nos caida.
Hopi biaha nos ta kere cu ta placa ta e solucion.
Y cuanto biaha nos no ta tira falta riba nos prohimo.
Tin momento nan cu nos ta discuti pa motibo di preocupacion.
Pero nos ta lubida cu maske cuanto nos preocupa toch nos no por cambia e situacion.
Ora bo cana conta tur hende bo asunto priva, locual ta priva ta bira publico.
Corda bon cu prome cu tur corant,y media tabata existi, ta boca di hende tabata hiba noticia.
Y mayoria biaha e asunto tabata wordo cambia na caminda, e ta bira un fake news.
Y aunke hopi biaha hopi hende sa e asunto, ningun hende tin e solucion pa bo.
Palabra di Dios ta sinja nos pa hiba nos asuntonan of peticion dilanti di Dios, eynan ta e lugar corecto, pasobra asina nos ta demostra obediencia na Dios, y confiansa den Dios.
Dios sa exactamente locual nos ta pasa aden, no tin ningun hende cu conoce nos curason mihor cu Dios, no lubida cu ta Dios a forma cada un di nos den barica di nos mama
.
Solamente Dios kier tende for di nos boca, locual cu nos tin mester, den tur sinceridad, pasobra nos tin cu corda cu Dios ta Tata di nos tur, y E tin poder pa yuda nos tur , pasobra semper nos ta keda un yiu pa Dios.
Ni maske kico un yiu haci, semper e ta keda yiu di su tata, esey no por cambia.
Dios kier pa nos no preocupa pa nada, den un palabra bisa no busca problema pa bo curpa, pa bo tin cu preocupa, pero por si acaso bo ta den un situacion cu bo no por sali. Dios kier pa presenta bo oracion y suplica cu gradicimento serca dj’E, y laga bo peticion ta conoci dilanti di Dios.
Pasobra mientras tanto bo no haci e esey , lo bo no tin pas, pasobra hende no por duna bo pas , material no por duna bo pas, droga y alcohol no por di duna bo pas, fiesta y parandiamento no por duna bo pas.
E palabra di Dios ta bisa bon cla , pa bo trece bo peticion dilanti di Dios, y e pas di Dios cu ta surpasa tur comprendemento, lo warda boso curason y boso mente den Cristo Hesus.
Esey ta nifica cu e pas di Dios, ta esun di e nivel mas halto cu hende por alcansa, caminda stress, depresion, cansancio mental ta cay na suela pa e pas di Dios por goberna.
Esaki ta e remedi precioso pa nos salud mental, caminda ansha y angustia ta wordo kibra, caminda nos sa cu Dios ta take care pa nos, y ta algo personal, pasobra ningun hende por entrega bo peticion na Dios mihor cu bo mes.
For di awe y padilanti, trece tur bo peticion dilanti di Dios y no preocupa.
Sinceramente, Pastor Marcel Balootje
