Durante e reciente reunionnan di Interparlementair Koninkrijksoverleg (IPKO) na Hulanda, lider di fraccion di AVP y parlamentario Jennifer Arends-Reyes a dirigi palabra na nomber di delegacion di Aruba, enfatisando e progreso cu Aruba ta realisando y e importancia di sigui fortalece cooperacion dentro di Reino Hulandes.
Den su intervencion, Arends-Reyes a pone enfasis riba e diferente pasonan cu Aruba a tuma den añanan reciente pa fortalece su posicion financiero, promove desaroyo economico y modernisa su institucionnan. Segun e parlmentario, Aruba ta construyendo activamente un sociedad moderno, sostenibel y financieramente fuerte, basa riba responsabilidad y bon gobernacion.
Como ehempel concreto di e progreso logra, Arends-Reyes a menciona cu Aruba a cera aña 2025 cu un surplus presupuestario di mas cu 135 miyon florin. Ademas, e debe publico a sigui baha y actualmente ta representa aproximadamente 56% di Producto Interno Bruto (GDP), un señal importante di recuperacion y disciplina financiero.
Sin embargo, Arends-Reyes a enfatisa cu no mester mira e cifra positivo aki como un fin den nan mes. “Stabilidad financiero no por keda limita na rapport y estadistica. E mester wordo sinti den e bida diario di nos pueblo. E meta final semper mester ta miho calidad di bida pa tur ciudadano,” el a expresa.
Segun e lider di fraccion di AVP, precisamente pa motibo ey Aruba ta continua inverti den area cu tin impacto directo riba bienestar di comunidad. Den sector di educacion, Aruba ta implementa e Plan Educacion Nacional 2030, cu e meta pa modernisa enseñansa, fortalece e conexion entre scol y mercado laboral, amplia habilidadnan digital y linguistico y sigui inverti den capacitacion di docente.
Na mes momento, Aruba ta traha pa fortalece e sistema di cuido prolonga, cu enfoke special riba anciano, persona cu discapacidad y famianan cu tin mester di sosten structural pa enfrenta e retonan social di futuro.
Arends-Reyes tambe a destaca inversionnan importante den infrastructura publico. Entre e prioridadnan tin mehoracion di camindanan, sistema di drenahe, iluminacion publico, siguridad den trafico y mantencion di edificionan gubernamental. Segun Arends-Reyes, infrastructura moderno y funcional ta un condicion esencial pa desaroyo economico y bienestar social.
Diversificacion economico ta sigui ocupa un puesto central den e vision di futuro pa Aruba. E parlamentario a indica cu e isla ta enfoca riba area manera energia renovabel, digitalisacion, industria creativo, economia circular, innovacion agricola y servicio profesional como motor pa crecemento economico sostenibel.
Tambe durante su presentacion, Arends-Reyes a menciona e modernisacion di e Landsverordening Normering Topinkomens (LNT), un iniciativa cu busca promove mas transparencia, fortalece bon gobernacion y logra un sistema di remuneracion mas balansa den institucionnan publico.
“Nos kier un gobierno transparente, responsabel y eficiente. Modernisacion institucional ta un componente esencial pa mantene confianza di ciudadano y garantisa cu ta maneha recurso publico cu debido cuidou,” Arends-Reyes a indica.
Na final di su intervencion, e lider di fraccion di AVP a reafirma cu Aruba ta kere firmemente den un Reino basa riba cooperacion, confianza mutuo y respet reciproco.
“Nos no mester debilita otro, sino fortalece otro. Aruba ta scoge progreso, responsabilidad, modernisacion y bon gobernacion. Door di traha hunto cu respet pa autonomia di cada pais, nos por construi un Reino mas fuerte, mas moderno y cu mas oportunidad pa tur ciudadano,” Arends-Reyes a conclui.
