Hende grandi sa bisa, E yiu cu no ta tende di su mama ate den boca di colebra, manera un cantica di hopi tempo pasa, cu awe keto bay ta ripiti ora hende su orea ta duro.
No solamente esey , pero Bijbel cual ta e palabra di Dios ta papia hopi cla di esey, por ehempel e palabra di Dios ta bisa esun cu ta cana cu hende sabi lo ta sabi, pero e esun cu cana den compania di hende bobo lo sufri danjo.( Proverbionan 13:20)
Tin hopi Proverbio y palabra di coreccion y instruccion den bijbel, pa asina evita cu hende ta cohe caminda robes, tanto mucha, hubentud y hende grandi si nan ta incoregibel y no kier scucha instruccion lo hanja nan mes envolvi den cos cu ta trece dolor pa nan mes y nan famia.
Esun cu stima disiplina ta stima conocemento,ma esun cu ta odia reprendemento ta bobo.( Proverbionan 12:1).
Cuanto biaha nos no ta tende e exprecion aki, “No bisami nada, ta ami sa kico mi ta haci”
of ta mi placa ta ami a traha pe lagami gaste manera mi kier no bisa nada,
Mi no tin cu nes mi ta bay caminda mi kier”of mas fuerte ainda, hende cu ta robes ta usa palabra di Dios pa defende nan mes bisando:
Esun cu ta sin pica tira e prome piedra, of pa continua den nan bagamunderia nan ta bisa ningun hende ta perfecto, y nan ta sigi bebe, droga, adultera,papia palabra sushi y hopi cos mas negativo.
Mientras cu Hesus ta bisa den Mateo 5: 48 : Pesey boso mester ta perfecto mescos cu boso Tata Celestial ta perfecto.
Y Pablo ta bisa den Filipensenan 3:15 : Pesey laga nos tur cu ta perfecto, tin e actitud aki, y si den caulkier cos boso tin un actitud diferente. Dios ta revela esey tambe na boso. Sinembargo laga nos sigi biba na e mesun nivel cu nos a alcansa caba.
Romanonan 6:13-14 ta para scirbi : No sigi presenta e miembronan di boso curpa pa pica,como instrumento di inhusticia, ma presenta boso mes na Dios,como esnan bibo for di mortonan, y boso miembronan como instrumento di husticia pa Dios. Pasobra pica lo no tin dominio riba boso, pasobra boso no ta bao di ley, ma bao di gracia.
Un hende cu ta bisti indecente y cu un pensamento di ta sexy, no solamente ta trece tentacion pa otronan cu ta mire, pero tambe ta rebaha e curpa cu ta tempel di Dios, y cu Spirito di Dios ta biba den dje, y ta usa miembro di su curpa pa inhusticia.
Awendia no ta tempo pa sconde nada pero hiba hende directamente na e berdad pasobra berdad ta haci hende liber.
E temor di Senjor ta instruccion pa sabiduria,y prome cu honor ta bin humildad.(Proverbionan 15:33).
Esun cu neglisha disiplina ta despresia su mes alma, ma esun cu ta scucha reprendemento,ta atkiri conocemento.(Proverbionan 15:32).
Pobresa y berguensa lo bin riba esun cu ta neglisha instruccion, ma esun cu ta haci caso di coreccion lo wordo honra.( Proverbionan 13:18).
Mi yiu no rechasa e displina di Senjor,ni aborece Su reprendemento.Pasobra Esun cu Senjor ta stima E ta reprende, mescos cu un tata ta reprende e yiu cu e tin delisia den dje.( Proverbionan 3:11-12).
Nos ta bibando den tempo trabahoso, caminda hopi hende ta tuma malo pa bon y tuma bon pa malo, caminda malbado ta wordo aplaudi y esun cu ta haci bon tin cu keda keto.
Ta tempo pa habri nos wowo y hala serca Senjor.
Sinceramente Pastor Marcel Balootje
