San Nicolas a haya un momento historico diaranson ora Prome Minister Mike Eman, hunto cu parokianonan y famia di difunto arkitecto Virgilio Kock, a revela oficialmente e seyo di monumento protehi na Kapel Emanuel na Grote Bergweg. E ceremonia, cu a wordo acompaña pa un misa special, tabata un homenahe na e legado di Virgilio Kock, kende a diseña e kapel y kende durante su bida a combina talento profesional cu un profundo sentido di servicio na Aruba.
Den su discurso, Prome Minister Mike Eman a subraya cu Virgilio Kock tabata mas cu un arkitecto. Segun e Prome Minister, Kock tabata un di e prome arkitectonan Arubiano cu a haya formacion academico den exterior y a scoge pa bolbe Aruba pa pone su conocemento na servicio di su pais. “E no solamente a laga atras edificionan impresionante, sino tambe un legado di servicio na comunidad,” Eman a expresa.
Prome Minister a menciona cu diferente miembro di famia Kock a sigui e tradicion di servicio publico. Eman a subraya e contribucion di ingeniero Ivonne Kock na preservacion di monumentonan nacional y e trabou di Monica Kock como representante di pueblo.
Monumentonan ta conta nos historia
Segun Prome Minister Eman, monumentonan no ta solamente piedra y cement, sino expresionnan di nos identidad como pueblo. “Monumentonan ta recorda nos ken nos ta, di unda nos a bin y cual balornan a forma Aruba,” Eman a bisa.
E tambe a pone enfasis riba e manera unico cu arkitectura Arubano ta adapta na nos clima y naturalesa. E a referi na e publicacion Bouwen op de Wind, cu ta enfatisa con nos casnan y edificionan tradicionalmente ta wordo construi teniendo cuenta cu e biento continuo cu ta caracterisa Aruba. “Nos casnan ta bunita pa un motibo. Nan ta construi cu biento, uzando un bendicion natural cu nos creador a duna nos y cu ta haci bida na Aruba unico,” Eman a expresa.
Un legado pa e generacionnan futuro
Cu e instalacion oficial di e seyo di monumento protehi, Kapel Emanuel ta bira parti formal di e patrimonio nacional cu mester wordo preserva pa generacionnan futuro. Prome Minister Mike Eman a expresa gratitud na Monumenten Bureau Aruba, na Iglesia Catolico, na e expertonan cu a contribui na e documentacion di e monumento y specialmente na famia Kock pa e legado cu nan a laga Aruba. Eman a conclui cu un invitacion na comunidad pa sigui sostene iniciativanan di preservacion. “Mas cu nunca, nos mester conserva e edificionan cu tin balor historico y cultural. Nan ta e refleho di alma di Aruba y un inspiracion pa e generacionnan cu ta bin despues di nos.”
