Parlamentario Xiomara Maduro a expresa preocupacionnan serio durante su prome ronda di debate riba e Fondo di Inversion y Desaroyo AIOF, indicando cu su fraccion no ta contra inversion ni desaroyo, pero cu e ley actual ainda no ta ofrece suficiente claridad y garantia pa e maneho di fondo publico.
Maduro a enfatisa cu Aruba mester sigui inverti den infrastructura, enseñansa, sostenibilidad, desaroyo economico y mehoracion di bario y San Nicolas. Sinembargo, segun e parlamentario, e pregunta principal no ta si Gobierno mester inverti, sino con e inversionnan lo wordo maneha, si e placa di pueblo lo wordo gasta na manera corecto.
Segun Maduro, ainda no tin un evaluacion cla cu ta mustra dicon e proyectonan di gobierno no ta wordo ehecuta na tempo of dicon presupuestonan ta keda sin wordo gasta na final di aña. E parlamentario a cuestiona si e problema ta falta di personal, planificacion of capacidad den ministerionan, y a argumenta cu sin un diagnostico corecto, no por garantisa cu e fondo ta e solucion adecuado.
Un otro preocupacion importante ta e posibilidad cu entidadnan priva of otro entidadnan publico por contribui na e fondo. Maduro a pidi mas claridad riba e reglanan, e influencia cu inversionistanan por haya y e garantianan pa evita conflicto di interes. Ademas, e parlamentario a señala cu e ley no ta inclui metanan concreto, KPI’s ni indicadornan pa midi e resultado di e fondo. “Sin metanan y evaluacion, ta dificil determina si e inversionnan realmente ta produci beneficio economico y social pa Aruba,” Maduro a expresa.
Maduro tambe a referi na e rapport “Buiten beeld, buiten controle” di Algemene Rekenkamer, cual ta enfatisa e importancia di transparencia y control financiero den inversionnan publico. E parlamemtario a puntra Gobierno con lo garantisa cu Parlamento y Pueblo lo ricibi informacion completo y na tempo tocante costo, progreso y resultado di proyectonan.
Na final di su discurso, e parlamentario a expresa preocupacion riba e cambio anuncia den liderato di gobierno, señalando cu un fondo di inversion a largo plaso no mester depende di e politico, sino di institucionnan fuerte, reglanan cla y suficiente control. “Aki ta na unda e Gobierno di AVP-FUTURO ta faya pa fortalece e departamentonan, ta keda sin pone reglanan cla den forma adelanta y no ta percura pa suficiente control,” Maduro ta expresa.
“Nos no ta contra inversion y nos no ta contra desaroyo,” Maduro a declara, “pero un ley cu ta move miyones di florin di placa di pueblo mester tin control, transparencia y responsabilidad.”
