𝐏𝐚𝐫𝐥𝐚𝐦𝐞𝐧𝐭𝐚𝐫𝐢𝐨 𝐗𝐢𝐨𝐦𝐚𝐫𝐚 𝐌𝐚𝐝𝐮𝐫𝐨 𝐭𝐚 𝐜𝐮𝐞𝐬𝐭𝐢𝐨𝐧𝐚: 𝐌𝐚𝐬 𝐝𝐢 𝐮𝐧 𝐚𝐧̃𝐚 𝐝𝐞𝐬𝐩𝐮𝐞𝐬, 𝐮𝐧𝐝𝐚 𝐞 𝐋𝐚𝐧𝐝𝐬𝐯𝐞𝐫𝐨𝐫𝐝𝐞𝐧𝐢𝐧𝐠 𝐈𝐧𝐬𝐭𝐞𝐥𝐥𝐢𝐧𝐠 𝐌𝐢𝐧𝐢𝐬𝐭𝐞𝐫𝐢𝐞𝐬 (𝐋𝐈𝐌) 𝐚 𝐤𝐞𝐝𝐚?

Parlamentario Xiomara Maduro ta expresa su preocupacion pa e hecho cu, mas di un aña despues cu Gobierno AVP-FUTURO a tuma mandato, Aruba ainda no tin un ‘𝘓𝘢𝘯𝘥𝘴𝘷𝘦𝘳𝘰𝘳𝘥𝘦𝘯𝘪𝘯𝘨 𝘐𝘯𝘴𝘵𝘦𝘭𝘭𝘪𝘯𝘨 𝘔𝘪𝘯𝘪𝘴𝘵𝘦𝘳𝘪𝘦𝘴’ (𝘓𝘐𝘔). Esta, e ley cu ta determina claramente con e carteranan ministerial ta reparti den e Gobierno di AVP-FUTURO.

Segun Maduro, esaki no ta solamente un asunto tecnico. Ta un asunto di transparencia, responsabilidad y bon gobernacion. E LIM ta e ley cu mester bisa claramente cual minister ta responsabel pa cual tarea. Sin un LIM cla, pueblo no sa ken tin cu responde ora tin problema of ora placa publico ta wordo gasta.

𝗖𝗼𝗻𝗳𝘂𝘀𝗶𝗼𝗻 𝗱𝗲𝗻 𝗽𝗿𝗮𝗰𝘁𝗶𝗰𝗮 𝗱𝗶𝗮𝗿𝗶𝗼

Maduro ta señala cu den practica e confusion ta bira cada dia mas evidente. “Nos ta mira Minister Geoffrey Wever ta papia constantemente riba e futuro di e refineria, mientras cu e cartera di energia ta cay bou di Minister Arthur Dowers. Di otro banda, Minister Wendrick Cicilia ta uza fondo di Aruba Tourism Authority (ATA) pa financia accionnan di limpiesa y procesamento di sushi, mientras cu e maneho di medio ambiente y Serlimar ta responsabilidad di Prome Minister Mike Eman.”

Segun e parlamentario, e confusion no ta para eynan. “Na San Nicolas nos a mira Minister Wendrick Cicilia ta organisa Carubbian Festival, mientras cu Minister Geoffrey Wever ta organisa un otro Food Festival den e mesun comunidad. Pueblo ta mira ministerionan ta traha riba mesun tereno, mientras cu no ta cla unda responsabilidad di un ta cuminsa y di otro ta caba.”

𝐂𝐨𝐨𝐩𝐞𝐫𝐚𝐜𝐢𝐨𝐧 𝐯𝐬 𝐜𝐥𝐚𝐫𝐢𝐝𝐚𝐝

Maduro ta enfatisa cu e problema no ta cu ministerionan ta coopera cu otro. “Cooperacion entre ministerionan ta algo positivo. Pero cooperacion no por substitui claridad. Prome mester tin un reparticion oficial di responsabilidad, y despues por tin cooperacion. Awo ta parce cu cada minister por drenta den cartera di otro sin cu pueblo sa ken realmente ta responsabel.”

Segun Maduro, e falta di un LIM ta stroba Parlamento di controla Gobierno. Un di e tareanan principal di Parlamento ta controla e Poder Ehecutivo. Pero con Parlamento por cuestiona e minister corecto, si e Gobierno mes no a formalisa oficialmente cual cartera ta pertenece na cual minister?

Maduro ta recorda cu un gobierno cu ta papia constantemente di bon gobernacion, transparencia y responsabilidad, mester cuminsa cu pone su propio cas den orden. “E pregunta ta simpel: despues di mas di un aña di gobernacion, dicon ainda no tin un LIM? Tanten cu e ley aki no ta na vigor, pueblo ta sigui mira confusion, responsabilidadnan mescla y falta di transparencia. Un gobierno no por pidi pueblo pa ta responsabel, si e mes no a defini oficialmente ken ta responsabel pa cual cartera.”

𝗖𝗼𝗻𝗰𝗹𝘂𝘀𝗶𝗼𝗻 

Maduro ta conclui bisando cu transparencia ta cuminsa cu claridad: “𝘈𝘳𝘶𝘣𝘢 𝘮𝘦𝘴𝘵𝘦𝘳 𝘶𝘯 𝘎𝘰𝘣𝘪𝘦𝘳𝘯𝘰 𝘶𝘯𝘥𝘢 𝘤𝘢𝘥𝘢 𝘮𝘪𝘯𝘪𝘴𝘵𝘦𝘳 𝘴𝘢 𝘴𝘶 𝘵𝘢𝘳𝘦𝘢, 𝘤𝘢𝘥𝘢 𝘧𝘭𝘰𝘳𝘪𝘯 𝘱𝘰𝘳 𝘸𝘰𝘳𝘥𝘰 𝘤𝘰𝘯𝘵𝘳𝘰𝘭𝘢 𝘺 𝘤𝘢𝘥𝘢 𝘤𝘪𝘶𝘥𝘢𝘥𝘢𝘯𝘰 𝘴𝘢 𝘦𝘹𝘢𝘤𝘵𝘢𝘮𝘦𝘯𝘵𝘦 𝘬𝘦𝘯 𝘵𝘢 𝘳𝘦𝘴𝘱𝘰𝘯𝘴𝘢𝘣𝘦𝘭 𝘱𝘢 𝘤𝘶𝘢𝘭 𝘥𝘦𝘤𝘪𝘴𝘪𝘰𝘯. Esaki ta precisamente e funcion di e Landsverordening Instelling Ministeries. Y despues di mas di un aña, pueblo merece un contesta riba e pregunta: 𝘂𝗻𝗱𝗮 𝗲 𝗟𝗜𝗠 𝗮 𝗸𝗲𝗱𝗮?”