Prome Minister Mike Eman a ricibi e atleta Arubiano di Mixed Martial Arts (MMA), Mayvir “Aruban Earthquake” Orman, den cuadro di su proximo participacion internacional na Asuncion, Paraguay. Mayvir actualmente ta SFC International Heavyweight Champion y ta preparando pa un reto nobo. Dia 19 di september 2026 e lo subi ring como Main Event di South American Fighting Championship (SFC), unda e lo bringa contra un atleta profesional di Argentina pa e titulo di SFC International Light Heavyweight Championship den categoria di 93 kilo. Prome cu e competencia, Mayvir lo sali di Aruba dia 9 di augustus pa un training camp intensivo na Exile Combat Studio na Bogota, Colombia.
Despues di su encuentro cu Prome Minister, Mayvir a expresa cu e ta hopi contento cu e palabranan di motivacion cu el a ricibi. “Nan a duna mi palabra di motivacion, y mi lo bin cu e faha pa Aruba. Cu hopi honor lo mi representa Aruba y lo mi bin cu e faha tambe.”
Mayvir, kende actualmente ta competi den heavyweight rond di 101 kilo, a splica cu e reto nobo aki ta duna e oportunidad pa busca un di dos titulo internacional, e biaha aki den light heavyweight. “Mi ta un heavyweight champion caba, y awor mi ta bay pa e titulo di light heavyweight.” E atleta Arubiano tambe a expresa su orguyo di por representa Aruba riba un plataforma internacional grandi. Segun Mayvir, e evento ta un colaboracion entre SFC y WKN, World Kickboxing Network, y su pelea contra e representante di Argentina lo ta e Main Event di anochi. “Aruba lo tin un plataforma basta grandi, y ami lo ta e Main Event di anochi contra Argentina.”
Prome Minister Mike Eman a desea Mayvir tur clase di exito durante su preparacion na Colombia y den su pelea na Paraguay, y a expresa su apreciacion pa e disciplina, dedicacion y manera cu e ta sigui representa Aruba cu orguyo riba escenario internacional. Mayvir tambe a invita comunidad di Aruba pa sigui su trayecto y sostene durante e competencia.
