E nacemento cerca Vogelpark Avifauna ta marca un resultado positivo despues di formalisacion di e colaboracion di 10 aña pa contribui na un poblacion di Lora saludabel, geneticamente diverso y autosostenibel na Aruba.
Oranjestad, Aruba — 24 augustus 2026 – Cuater baby Lora a nace recientemente cerca Vogelpark Avifauna na Hulanda, partner internacional di Aruba Conservation Foundation (ACF), marcando un otro paso importante den e Programa di Reintroduccion y Conservacion di Lora y den e colaboracion a largo plaso entre ambos organisacion.
E noticia ta resultado di un Memorandum of Understanding (MOU) di 10 aña entre ACF y Vogelpark Avifauna cu a firma na maart di e aña aki. E cuater baby Loranan aki ta forma parti di e programa internacional di cria pa conservacion coordina door di Avifauna, como coordinador apunta pa e European Association of Zoos and Aquaria (EAZA) Ex-Situ Programme (EEP) pa Lora cu 14 diferente zoo Europeo participando den e programa. E programa ta enfoca riba mantencion di un poblacion saludabel y geneticamente diverso cu eventualmente por contribui na fortalecemento di e poblacion den naturalesa na Aruba.
Si tur cos sigui segun plan, e Loranan nobo lo haci e biahe pa Aruba den aña 2027 pa forma parti di e siguiente fase di e programa. ACF lo percura pa un condicion y cuido optimal prome cu liberacion den naturalesa di Aruba.
Di extincion local pa un poblacion creciente.
E ultimo Amazona barbadensis, conoci localmente como Lora, a wordo mira den naturalesa na Aruba na aña 1947. Captura ilegal pa comercio di mascota, persecucion como plaga den agricultura y perdida di habitat a contribui na extincion local di e especie.
Despues di mas cu 70 aña di ausencia y añanan di preparacion hunto cu partnernan local, regional y internacional, ACF a reintroduci e prome 25 Lora den naturalesa di Aruba na 2024. E Loranan, cu anteriormente a wordo confisca for di comercio ilegal, awor ta bula liber y a cuminsa reproduci mas prome cu inicialmente a spera unda cu sigur un Lora sigur ya a nace den naturalesa.
E progreso aki ta uno di speransa, pero pa e poblacion bira berdaderamente autosostenibel, diversidad genetico ta esencial. Añadi Loranan cu un salud genetico fuerte ta yuda fortalece e poblacion, aumenta su resistencia y duna e especie un miho oportunidad pa prospera a largo plaso. E nacemento di e cuater baby Lora na Avifauna ta representa un paso concreto den e direccion ey.
Loke ta cuminsa miles di kilometer for di Aruba por crea un efecto cu eventualmente ta yega nos tera. Conocemento comparti por bira accion. Un colaboracion por crea posibilidad. Y añanan di trabou colectivo por eventualmente traduci den bida nobo cu por contribui na restauracion di un especie na e luga cu un tempo e tabata yama cas.
E trabou no ta termina ora Lora bolbe cas
Mientras partnernan internacional ta contribui na crea un poblacion saludabel y geneticamente diverso, futuro di Lora finalmente tambe ta depende di e condicionnan cu nos crea pa nan aki na Aruba. E historia di e especie mes ta un recordatorio di esey. Comercio ilegal y perdida di habitat tabata entre e factornan cu a contribui na su desaparicion for di Aruba. Awe, nos decisionnan por contribui na un resultado diferente.
No cumpra, tene of sostene comercio ilegal di Lora, duna nan espacio den naturalesa, proteha nan habitat y reporta actividadnan cu por pone e especie na peliger ta manera cu comunidad por yuda proteha e progreso cu ta wordo logra.
Restauracion di e populacion di un especie no ta termina cu su regreso. E berdadero exito ta cu e especie por keda, reproduci y eventualmente sostene su mes den naturalesa.
ACF ta gradici Vogelpark Avifauna y tur partnernan local, regional y internacional cu ta contribui nan conocemento, experiencia, dedicacion y cuido na e Programa di Reintroduccion y Conservacion di Lora.
Naturalesa no conoce frontera, y cada esfuerso por crea un efecto cu ta yega mucho mas leu cu e luga unda e a cuminsa. Awe, cuater baby Lora na Hulanda ta duna nos un otro motibo pa mira futuro di Lora na Aruba cu speransa.
Tocante Aruba Conservation Foundation
Aruba Conservation Foundation (ACF) ta un organisacion independiente dedica na conservacion y maneho sostenibel di naturalesa di Aruba. ACF ta traha pa proteha y restaura biodiversidad di Aruba mediante maneho di areanan protegi, conservacion di especie, investigacion, educacion, involucracion di comunidad y colaboracion.
