Parlamentario di AVP, Dennerich Kelly ta aprecia cu despues di e prome publicacion, otro voz y medio tambe a sigui profundisa riba e tema. Esaki ta positivo, pasobra e reto aki no ta pertenece na un persona, partido of institucion. Ta un combersacion cu Aruba mester tin.
Den e di dos parti di su reflexion tocante educacion, salario y regreso di profesionalnan Arubiano, ta enfatisa cu trece talento bek Aruba ta solamente un paso. E reto principal ta crea un pais caminda profesionalnan por progresa, sinti nan aprecia y haya motibo pa keda.
E reaccionnan riba e prome publicacion a mustra cu salario ta importante, pero no ta e unico factor. Vivienda, costo di bida, oportunidad pa crece profesionalmente, reconocemento di estudio y experiencia, y e sentimento cu conocemento no semper ta wordo scucha of aprecia, tur ta influencia e decision pa bolbe. Manera Kelly a indica anteriormente: un profesional no ta compara simplemente dos salario; e ta compara dos bida.
Aruba mester conoce su necesidadnan
Pa formula un maneho efectivo, Aruba mester determina cua profesionnan lo enfrenta escasez den cinco, dies of diescinco aña; cua estudio nos hobennan ta sigui; cuanto ta gradua y bolbe; den cua sector nan ta traha; y kico ta motiva otro pa keda afo. E informacion necesario no ta concentra den un solo instancia. CBS, Enseñansa, Finansa, sector laboral, dunadornan di trabou y organisacionnan cu ta guia studiantenan tur tin un parti di e realidad.
Segun Kelly, Aruba no necesariamente mester cuminsa cu otro estudio grandi. E pais por cuminsa cu conecta mihor e informacion cu ya ta existi, identifica unda ainda tin falta di dato y fortalece colaboracion entre e instancianan concerni. “Si nos kier planea pa futuro, nos mester conoce mihor e realidad di awe,” e ta expresa.
Contacto cu talento mester cuminsa mas trempan
Aruba ta haci esfuerzo pa mantene contacto cu studiantenan den exterior y participa na feria di empleo na Hulanda. Esaki ta positivo, pero e relacion cu talento no por cuminsa solamente ora un studiante ta cerca di gradua of ora Aruba urgentemente tin mester di un profesional.
Durante estudio, Aruba por mantene contacto, crea oportunidad pa stage, conecta studiantenan cu profesionalnan y dunadornan di trabou local, y informa nan tocante desaroyonan y oportunidadnan riba nan isla. E pregunta no mester ta solamente: “Ki ora bo ta bolbe?” E meta mester ta cu, durante nan estudio, Aruba sigui forma parti di e futuro cu nan ta visualisa pa nan mes.
Bolbe Aruba no ta e meta final
Un ticket di avion pa Aruba no ta determina exito di un politica di regreso. E pregunta esencial ta kico ta pasa despues. Si profesionalnan tin e sentimento cu nan conocemento, experiencia y merito no ta wordo suficientemente reconoci, Aruba mester scucha e señal ey.
Kelly ta subraya cu esaki no mester bira un acusacion politico, sino un reto di mentalidad cu sociedad mester enfrenta. Merito, capacidad y profesionalismo mester conta. Dunadornan di trabou, tanto publico como priva, tin responsabilidad pa crea un ambiente caminda talento por aporta, wordo desafia y sigui crece. Atrae talento sin crea condicion pa talento keda ta laga e trabou mitar.
Di actividad pa resultado
Un job fair, programa of campaña por ta un bon iniciativa, pero despues mester evalua su resultado: cuanto hende a wordo alcanza; cuanto a aplica; cuanto a bolbe; cuanto a haya trabou relaciona cu nan preparacion; y cuanto ainda ta Aruba despues di algun aña. “Evaluacion no ta critica; evaluacion ta necesario pa siña,” Kelly ta remarca.
Un programa cu funciona mester wordo fortifica. Uno cu mester adaptacion, mester cambia. Y loke no ta produci resultado no mester sigui solamente pasobra semper a hacie asina. Esaki ta e diferencia entre bon intencion y resultado cu por wordo midi.
Tres paso concreto for di Parlamento
Kelly ta reconoce cu un Parlamentario no ta ehecuta maneho di Gobierno, determina salario den sector priva ni por resolve e asunto su so. Parlamento, sinembargo, por haci pregunta, controla maneho, solicita informacion, pone tema riba agenda y stimula colaboracion. P’esey Kelly lo concentra su contribucion riba tres paso concreto.
Promove cu informacion existente tocante estudio, mercado laboral, escasez y regreso di profesionalnan wordo conecta mihor; solicita mas claridad tocante resultado y seguimiento di feria di empleo y otro iniciativa pa conecta cu talento Arubiano den exterior; y sigui impulsa un dialogo estructural entre Gobierno, Enseñansa, sector laboral, dunadornan di trabou, profesionalnan y esnan cu ta acompaña nos studiantenan afo.
E meta ta un vision di varios aña: no un plan di un solo departamento ni un proyecto temporal pa momento cu tin escasez, sino un cadena cu ta conecta enseñansa, estudio, experiencia, oportunidad, regreso y retencion.
Salario, vivienda y costo di bida ta asuntonan complejo cu ta pidi decisionnan responsable y sostenible, pero complexidad no por ta un motibo pa no cuminsa. Aruba por sigui scucha, conecta loke ya sa, midi loke ta haci, traha hunto y adapta unda ta necesario.
“Nos meta no por ta solamente convence un profesional pa bolbe Aruba. Nos mester crea un Aruba caminda e profesional ey, cinco of dies aña despues di a bolbe cas, por bisa: ‘Mi a haci e decision corecto pa bolbe,’” Kelly ta conclui.
