Duna gradicimento na Senjor invoca Su nomber, haci Su hechonan conoci den e pueblonan.( Salmo 105:1)
Ora nos duna testimonio di locual Dios a haci, no ta pa nos halsa nos mes, pero ta pa nos halsa e nomber di Dios, Su poder, Su misericordia y Su compasion cu e tin cu nos , y tur locual nos papia ta pa Dios ricibi tur honor y gloria, pasobra nos no por a logra si Dios no a interveni.
Hende no por biba independiente di Dios, pasobra Dios tin control y Dios ta riba tur cos, pesey tur dia 24/7 nos mester ta agradecido na Dios pa tur locual cu E a haci den nos bida y tur locual E ta bay haci den nos bida.
Nos confiansa den Dios, ta haci Dios contento, pasobra esey ta demostra cu no solamente nos ta papia di Dios, pero cu nos ta kere den Dios cu E ta capas y E tin tur poder.
Pa Dios no tin nada imposibel, ta hende mester kere, tur cos ta posibel pa esun cu ta kere, no lubida locual ta para scirbi den Lucas 1:37.
Gratitud ta boluntad di Dios, hende mester keda gradici Dios tur momento, e palabra di Dios ta bisa den Filipensenan 4:6-7: No preocupa pa nada,ma den tur cos,pa medio di oracion y suplica cu gradicimento, laga boso peticionnan ta conoci dilanti di Dios. Y e pas di Dios, cu ta surpasa tur comprondemento, lo warda boso curason y boso mente den Cristo Hesus
No preocupa ora bo haci algo pa un hende, y e hende lubida, no tira nada na cara di ningun hende, kico bo a haci pa nan. Pasobra den cielo Dios mes ta nota tur locual nos haci bon of malo.
Pasobra na final E mes lo regla cuenta cu nos di tur locual nos a haci sea bon of malo.
Si un hende mester paga bo cu malo y abo a haci bon cune, no preocupa, sigi pusha pa bo bay dilanti, laga esey ta un piedra pa bo trapa riba dje pa bo alcansa bo meta, nunca stop di haci bon pa motibo di hende malagradeci. Sigi perservera, y riba tur cos no paga malo cu malo.
Pesey nos tin cu gradici Dios tur momento, pasobra Dios ta donjo di nos bida, y nos rosea. E tin poder pa halsa hende y E tin poder pa baha hende, pesey hende nunca mester lubida locual Dios a haci pa nan.
Cuanto biaha un hende ta riba cama di malesa, y e ta grita Senjor, Senjor, yudami por fabor, pero ora e lanta for di e cama, segun tempo ta pasa e ta lubida riba e Dios cu a sane, y e no ta bishita cas di Dios ni sikiera pa gradici.
Tin biaha hende ta comporta nan mes cu Dios, manera un mucha cu a wordo bon cria den cas, y cu semper su mayornan a para na su banda y dune tur cos, y awor cu e bira grandi, su mayornan ta yame pa un bishita, e no ta worry cu telefon, tur momento e ta ganja cu e lo pasa, pero e no ta pasa.
Nos tin cu corda cu ta Dios tin nos man tene, wak kico su palabra ta bisa den Salmo 119:105.
Wak kico su palabra ta bisa den Juan 15:5 y para keto un rato y sea agradecido na Dios, Kende hasta den bo sonjo E ta cuida bo.
Duna gradicimento na Senjor, pasobra E ta bon, pasobra Su misericordia ta pa semper.(Salmo 136:1).
Sea agradecido na Dios den tur cos.
Sinceramente, Pastor Marcel Balootje
