Evangelista Mateo a cuminsa cu’n lista largo di tur antepasadonan di Hesus y e plan di Dios. For di Abraham te cu David a pasa 14 generacion y for di David te cu e deportacion dje Israelitanan pa Babilonia a pasa 14 generacion mas y for dje tempo ey te cu nacemento di Hesus tin 14 generacion mas. Dios a uza tur hende pa trece salbacion, y meymey di nos dudanan Dios a corda nos cu Hesus ta “Dios cu nos” den tur momento. Ora Hose a haya sa cu Maria ta na estado, e no kier a perhudica Maria y a pensa di bandon’e den secreto. Dilanti miedo y duda un angel a pidi Hose pa no tene miedo pa ricibi Maria, e contesta di Hose a demostra un fe activo y confiansa den e plan divino pa obra di Spirito Santo. Cu nacemento di Hesus a cumpli e profecia di trece e presencia real di Dios den nos bida. Nos no ta cana nos so den dificultad, Dios ta cana cu nos tur dia.
Oracion: Señor duna nos un spirito generoso y obediente manera San Hose pa biba nos vocacion cristian cu e mesun generosidad y grandesa di spirito. Amen.
