Costo di bida na Aruba a bolbe subi durante augustus 2026. Segun e cifranan mas reciente di Oficina Central di Estadistica (CBS), Indice di Prijs di Consumo (CPI) a aumenta cu 0.5% compara cu juli, mientras cu inflacion anual a yega 2.7%.
E CPI a pasa di 111.53 na juli pa 112.12 na augustus. Compara cu augustus 2025, ora e indice tabata 109.14, esaki ta representa un aumento anual di 2.7%. Inflacion promedio anual a yega 1.0%.
Un di e datonan cu ta resalta mas ta e aumento den bestaansminimum. Segun CBS, na augustus 2026 un hogar consistiendo di dos adulto y dos mucha entre 0 y 14 aña mester Afl. 5,663 pa mantene un nivel di bida considera adecuado. Na juli e suma tabata Afl. 5,634, esta un aumento di Afl. 29 den solamente un luna.
Pa un persona adulto cu ta biba su so, bestaansminimum a subi di Afl. 2,683 na juli pa Afl. 2,697 na augustus, un diferencia di Afl. 14.
Mirando un aña atras, e diferencia ta mas significativo. Na augustus 2025, bestaansminimum pa un famia di dos adulto y dos mucha tabata Afl. 5,519. Un aña despues esaki ta Afl. 5,663, esta Afl. 144 mas. Principalmente cuminda y transporte a contribui na e aumento. Costo di cuminda y bebida no alcoholico a aumenta cu Afl. 86, mientras cu transporte a aumenta cu Afl. 35.
Transporte tabata tambe e sector cu mayor impacto riba CPI durante augustus. E sector a registra un aumento di 3.4%. Restante bienes y servicio a aumenta cu 1.0%, mientras vivienda a registra un aumento di 0.3%.
Un factor importante tras di e aumento den transporte ta prijs di combustible. Na augustus, prijs di gasolin a aumenta cu 25.1 cent, of 9.4%, mientras diesel a aumenta cu 29.7 cent, of 11.6%. Alabes, prijs promedio internacional di petroleo a subi di US$79.32 pa US$83.74 pa bari.
Cuminda tambe ta sigui pone presion riba presupuesto di consumidor. Den augustus, indice di “Cuminda na cas” a aumenta cu 0.5%. Batata, yuca y batata dushi a registra e aumento mas grandi cu 16.8%, sigui pa fruta cu 2.2%. Pisca y otro cuminda di lama, na otro banda, a baha cu 2.9%.
Den comparacion anual, situacion ta mustra cu costo di varios necesidad basico ta sigui subi. Den ultimo 12 luna, CPI a aumenta cu 2.7%, mientras transporte a subi cu 10.7% y cuminda y bebida no alcoholico cu 3.8%.
E cifranan di CBS ta mustra cu, apesar cu no tur categoria a registra aumento, costo necesario pa un persona of famia mantene un nivel di bida adecuado na Aruba ta sigui subi. Pa famianan cu entrada limita, cada aumento den cuminda, transporte y otro gastonan esencial ta pone mas presion riba presupuesto mensual.
