“Ora nos ta papia di hospital, nos ta papia di hende. Tras di cada cifra tin un realidad humano.” Cu e palabranan aki, parlamentario y enfermero Dennerich G. Kelly ta pidi claridad y accion concreto tocante e situacion di likidez na Hospital Dr. Horacio E. Oduber (HOH). Segun Kelly, continuidad di cuido pa pashentnan mester keda na prome luga, mientras gobierno, HOH y AZV ta traha hunto riba un solucion responsabel y duradero.
Kelly a bishita hospital y papia cu su directiva pa compronde e factornan cu ta pone presion riba e institucion. Segun e informacion cu el a ricibi, demanda y gastonan di cuido a aumenta, mientras financiamento no a sigui e mesun ritmo. E presion aki por afecta pago na proveedornan, disponibilidad di material, capacidad di hospital y tempo di espera. Un hospital amplio tambe ta exigi personal, ekipo y mantencion; p’esey, Kelly ta pidi pa evalua si e calculonan y acuerdonan di financiamento ta cubri su funcionamento cu ta cuadra cu e realidad nobo cu hospital ta desde cu amplia esaki.
Un punto cu mester haya claridad urgente ta e reclamo publico di HOH cu tin mas di Afl. 29 miyon na cuenta habri pa cuido brinda na personanan cu no ta cay bou di AZV. Segun hospital, e suma a acumula durante ultimo añanan y e ta prepara un caso sumario contra Pais Aruba pa determina ken mester paga. Kelly ta enfatisa cu e cifra ta un reclamo di HOH cu mester wordo verifica y fundamenta, cu claridad riba e añanan, tipo di cuido, tarifanan, facturanan, pagonan ricibi y base huridico.
“E problema no a nace awe. Si gastonan ta acumula desde 2017 y directornan anterior a bati porta di gobierno, cada periodo di gobernacion mester duna cuenta di su decisionnan,” Kelly a declara. Na mes momento, el a destaca cu gobierno actual no por uza pasado como excusa. “Desde cu AVP y FUTURO a ricibi mandato pa goberna, e problema aki tambe ta nos responsabilidad.”
Kelly ta propone pa trata e situacion cu e mesun disciplina cu cuido di un pashent den condicion critico: stabilisa, diagnostica, trata y controla. Prome, proteha continuidad di cuido mientras ta resolve discusionnan financiero. Despues, verifica e reclamo di HOH y analiza demanda, gastonan, capacidad y e financiamento actual. Riba base di e diagnostico ey, acorda medidanan temporal pa alivia e presion y traha riba un modelo sostenibel desde awo enadelante. Segun Kelly, un fondo separa pa cuido necesario na personanan no sigura merece evaluacion serio y accion concreto.
Finalmente, parlamento mester sigui e resultado: tempo di espera, disponibilidad di material, presion riba personal, financiamento y calidad di cuido. “Investigacion no por bira un sala di espera. Dato cu no ta conduci na decision finalmente ta keda solamente papel,” el a bisa.
Kelly ta haci un yamada pa sostene un debate firme y respetuoso. “Critica fuerte nunca ta hustifica menasa of atake personal den direccion di directiva di hoapital y tampoco den direccin di madatario di nos pais. E situacion ta serio, pero no mester crea panico; e mester crea direccion. Nos pueblo merece claridad, trankilidad y confianza.”
