Parlamentario di AVP, John Hart, a reafirma e compromiso di su partido cu construccion, union y bienestar general di Aruba durante su discurso na Congreso AVP 2026, celebra na Marriott Ballroom. Den e encuentro, caminda liderazgo di AVP a pasa na Wendrick Cicilia, Hart a destaca vision, responsabilidad y curashi como e tres caracteristicanan cu ta guia e partido.
Hart a cuminsa reconociendo e legado di esnan cu a cana dilanti. El a señala cu e generacion actual ta para riba nan schoudernan y ta haya inspiracion den nan vision y concepto di liderazgo. Segun Hart, e combinacion di vision, responsabilidad y curashi a contribui na forma AVP como e partido cu e ta awe.
El a recorda cu AVP ta e partido cu mas aña di existencia na Aruba y cu, den e ultimo eleccion, un biaha mas el a resulta como e partido mas grandi di e pais. Hart a presenta e trayectoria aki como un responsabilidad pa sigui traha na bienestar general di e comunidad.
Den su discurso, Hart a critica loke el a describi como intentonan di oponentenan politico pa crea division y debilita e spirito Arubiano. El a expresa preocupacion cu, segun su evaluacion, mensahenan di negativismo den radio y corantnan ta stroba debatenan importante pa bienestar di e pais.
Frente na esaki, Hart a reafirma e direccion cu AVP kier sigui: “Nos kier construi, no destrui. Nos kier union, no desunion.”
Pa ilustra e balor di curashi, Hart a referi na e periodo despues di ceramento di Lago. El a destaca cu na 1986, Aruba a demostra curashi door di traha duro pa supera e retonan cu e ceramento a trece cu ne. E experiencia aki a sirbi den su discurso como un recordatorio di e capacidad di e pueblo pa enfrenta dificultad y sigui dilanti.
Hart a identifica solidaridad, responsabilidad y defensa di e pais como fuentenan di inspiracion pa e trabou di AVP. Alabes, el a pone enfasis riba husticia social, splicando cu esaki ta nifica traha pa atende e necesidadnan humano real den e comunidad.
Den e contexto aki, Hart a anuncia cu pronto leynan importante lo yega na sala di Parlamento, entre nan legislacion pa pension general pa trahadornan y pa cuido di adultonan mayor. El a relaciona e iniciativanan aki cu e compromiso di e partido pa duna respuesta na e necesidadnan di hende.
E leynan anuncia pa pension general y cuido di adultonan mayor ta duna un direccion concreto na e compromiso cu Hart a reafirma durante e congreso: traha pa atende e necesidadnan real di e comunidad, guia pa solidaridad, responsabilidad y husticia social.
“AVP a nace pa traha historia, nos ta parti di historia,” Hart a expresa, vinculando e legado di e partido cu e responsabilidad di sigui contribui na bienestar di Aruba.
