Durante Congreso di AVP dia 4 di october 2026, Wendrick Cicilia a asumi oficialmente liderazgo di partido, recibiendo e responsabilidad di Mike Eman despues di 25 aña na cabes di AVP. Den su discurso, Cicilia a expresa gratitud pa e legado di servicio di Mike Eman y a reafirma su compromiso cu dignidad humano, solidaridad y bienestar di comunidad.
Cicilia a describi e momento como un honor y un responsabilidad cu e ta acepta cu humildad, respet pa e generacionnan anterior y confiansa den futuro di Aruba.
“Relevo ta nifica honra pasado, siña for di dje y tuma e miho di dje pa construi futuro,” Cicilia a expresa, enfatisando cu AVP ta un partido di historia y trayectoria, cu un fundeshi cu ta continua guia su trabou.
Gratitud na Mike Eman
Cicilia a dedica un parti special di su discurso na Mike Eman, gradiciendo su servicio, e responsabilidad cu el a carga y su contribucion na pensamento di AVP. El a destaca cu Eman a recorda partido constantemente cu politica mester ta dirigi na bon comun y na e realidad di hende cu diariamente ta traha, cria nan yiunan, cuida nan mayornan y busca un miho futuro.
“Danki pa mustra nos liderazgo, no ta poder sino mas bien e deseo pa sirbi,” Cicilia a expresa.
El a reconoce tambe e importancia di contacto directo cu comunidad, amor pa prohimo y dialogo constructivo como enseñansanan cu lo sigui guia e proximo etapa di partido.
Un compromiso cu comunidad
Pa e lider nobo di AVP, e traspaso ta bay man den man cu un compromiso ainda mas fuerte cu tur esnan cu ta forma parti di comunidad. Inverti den progreso y bienestar di Aruba ta un trabou continuo, cu mester crea oportunidad y haci diferencia den bida di hende.
Den su discurso, Cicilia a pone enfasis riba dignidad y potencial di cada persona: e mucha cu ta lucha na scol, e famia cu ta traha duro pa yega fin di luna, e pensionado, e persona cu tin un limitacion, e empresario chikito y e hoben cu tin un idea nobo.
“Si un parti di Aruba ta keda atras, Aruba no por realmente progresa,” el a señala, subrayando cu mester comparti e progreso economico cu comunidad.
Scucha, uni y asumi responsabilidad
Cicilia a enfatisa cu liderazgo ta rekeri pasion, amor pa bo hendenan y disposicion pa scucha. El a reconoce cu ningun lider tin tur contesta y cu e sabiduria pa sigui construi Aruba ta den su mayornan, hobennan, profesionalnan, trahadornan, empresarionan, maestronan y famianan.
E proximo capitulo di AVP, segun Cicilia, lo combina continuidad den balornan cu renobacion den ideanan, curashi den accion y responsabilidad pa resultadonan. E compromiso ta inclui cuido pa naturalesa y cultura, oportunidad pa hobennan y responsabilidad pa e generacionnan cu ta bin.
“Mi ta acepta e responsabilidad di e momento aki cu humildad. Cu respet pa esnan cu a bin prome. Cu confiansa den esnan cu ta para banda di nos awe. Y cu speransa den esnan cu ainda ta bin despues di nos,” Cicilia a expresa.
El a conclui su discurso cu un yamada pa unidad y servicio, cu amor pa Aruba como e forsa cu ta uni e proximo etapa di partido: “Nos ta e generacion di relevo. Nos ta bolter cos.”
