Parlamento a haya un presentacion hopi interesante y valioso di FEPOH tocante problema di desaroyo di idioma (TOS) na Aruba. E presentacion a cuminsa cu un “ice breaker” interactivo, cu a mustra di un manera simpel pero hopi impactante con grandi e impacto di un problema di desaroyo di idioma por ta riba comunicacion y comprension.
Un di e conclusionnan importante di e presentacion tabata con facil comunicacion por bai robes ora un persona tin dificultad cu comprension of procesamento di idioma of habla. Ora bo ta duna instruccion y bo no por controla si e persona a compronde realmente loke bo a bisa, e mensahe por wordo interpreta di un manera totalmente diferente cu loke tabata e intencion. Precisamente p’esey ta importante pa detecta un problema di desaroyo di idioma of habla tempran y pa mayornan, maestro y otro profesional sa unda nan mester pone atencion.
Reconocemento tempran ta nifica cu por tene cuenta na tempo cu e necesidadnan di e mucha y cu por duna e sosten apropia. Esaki por haci un diferencia importante den e desaroyo, den educacion y eventualmente tambe den e oportunidadnan di un mucha.
FEPOH a indica tambe cu tin necesidad pa mas personal specialisa, ampliacion di nan oficina y mas recurso pa material didactico, incluyendo traduci y adapta metodo existente na Papiamento.
Fraccion di MEP ta considera cu e señalnan aki mester wordu tuma na serio. Inverti den reconocemento tempran y bon sosten pa muchanan cu tin un problema di desaroyo di idioma y habla no ta solamente inverti den educacion, sino ta inverti den futuro di nos muchanan y di Aruba.
