Parlamentario di AVP, Dennerich Kelly, a reacciona riba e revelacionnan reciente tocante anotacionnan personal di Prinses Beatrix. Segun un investigacion publica recientemente, Beatrix a califica e desaroyonan rond di Status Aparte di Aruba na 1983 como “fataal” y a cuestiona pakico Betico Croes mester a causa “asina tanto daño”.
Den un video graba na Plaza Betico Croes, Kelly a expresa su lamento tocante e manera cu e lucha historico di e pueblo Arubiano pa su Status Aparte tabata wordo mira den e anotacionnan aki.
“Como Arubiano, mi ta lamenta e manera aki di mira un lucha cu pa nos pueblo tin un nificacion profundo”, e Parlamentario a expresa.
Kelly a enfatisa cu diferencianan politico no mester stroba reconocemento di Betico Croes su contribucion historico pa Aruba su Status Aparte.
“Betico su contribucion no ta propiedad di un partido politico. E ta parti di e historia di Aruba”, Kelly a declara.
E Parlamentario a subraya cu su reaccion ta expresa cu respet pa Cas Real Hulandes y cu comprension pa e complehidad di e decisionnan politico y constitucional durante e decada di añanan 80. Sinembargo, el a destaca cu e lucha pa Status Aparte ta representa un parti importante di identidad nacional di Aruba, y cu nos historia merece seriedad y dignidad.
“Mi ta miembro y Parlamentario di partido AVP. Betico Croes ta identifica historicamente cu partido MEP. Pero e historia di Aruba ta mas grandi cu AVP y MEP.”
Segun Kelly, reconoce Betico su contribucion no ta nifica identifica cu un partido politico, sino duna reconocemento na un figura cu a contribui decisivamente na un logro historico di Aruba.
E Parlamentario a conclui su mensaje cu un yamada pa respet mutuo y reconocemento di nos historia comparti.
“Nos por tin diferente color y pensamento politico. Pero prome cu tur cos, nos ta Arubiano. Y nos historia merece respet.”
