Zonificacion y restriccion riba tereno di erfpacht ta lanta pregunta serio tocante igualdad di oportunidad y libertad di empresa na Aruba.
E maneho nobo cu Gobierno di Aruba a anuncia pa regula e industria di short-term vacation rentals, popularmente conoci como Airbnb, ta lanta preocupacion serio tocante e futuro di inversionistanan local y e posibilidad pa hobennan Arubiano participa den un industria cu ta genera actividad economico.
Segun Parlamentario Dangui Oduber, Gobierno mester evita cu e maneho nobo aki di regulacion ta bira un sistema den cual solamente un grupo limita di propietarionan y inversionistanan por beneficia di e industria turistico.
“Nos mester regula e industria, esey ta sigur, pa asina tur hende paga nan ‘fair share’. Pero regulacion no mag bira exclusion. Aruba no por yega na un situacion caminda un hoben Arubiano cu kier inverti den un apartamento of cas di vakantie no tin e oportunidad, mientras otro inversionista cu ya tin propiedad den zonanan permiti si por sigui beneficia.”
Zonificacion: ken ta keda aden y ken ta keda afo?
Un di e preocupacionnan principal ta e zonificacion cu Gobierno ta contempla. Segun informacion cu ta circula, areanan manera Westpunt y Malmok lo por keda den e zonanan permiti pa vacation rentals, mientras otro barionan lo enfrenta restriccion. Si esaki wordo confirma, e pregunta ta: Dicon un propietario den un bario si por participa den e industria, mientras un otro propietario den un otro bario no?
Oduber ta considera cu Gobierno mester presenta e mapa completo di zonificacion, e criterionan utilisa y un analisis di impacto economico y social prome cu implementa e maneho aki. Ademas, mester investiga con e reparticion di propiedad den e zonanan permiti ta compara cu esun den otro barionan, pa determina si e inversionista local lo haya oportunidadnan igual.
Tereno di erfpacht: Un otro obstaculo pa e localnan
Un otro punto di preocupacion ta e intencion pa restringi uzoodi tereno di erfpacht pa vacation rentals.
Na Aruba, hopi ciudadano ta depende di erfpacht pa logra construi nan propio cas of realisa un inversion. Un prohibicion general por afecta famianan cu kier genera un ingreso adicional door di huur un apartamento of un parti di nan propiedad.
“Nos kier stimula negoshi local, pero alabes nos ta considera medida cu por limita e oportunidad di e mesun Arubiano pa bira empresario. Gobierno mester splica con e maneho aki ta cuadra cu su meta di diversificacion economico y stimulacion di inversion local.”
Libertad di empresa y igualdad di oportunidad
Na Aruba, turismo ta hunga un papel fundamental. E industria di vacation rentals a habri porta pa diferente tipo di empresario, desde propietarionan chikito te na personal di limpieza, companianan di mantencion y otro proveedornan di servicio.
Regulacion ta necesario pa proteha barionan residencial, controla desaroyo y garantisa siguridad. Sinembargo, e medidanan mester ta proporcional, transparente y aplica segun criterionan obhetivo.
Mester enfatisa cu mester proteha e inversionistanan chikito, esnan cu tin un of dos camber of un apartamento na cas, sea na Paradera, Madiki of cualkier otro districto.
E pregunta fundamental ta si e maneho nobo aki lo logra un balansa entre proteccion di comunidad y libertad di empresa, of si lo bay crea bareranan nobo pa e inversionista local.
Ta exigi claridad di Gobierno
Parlamentario Oduber ta considera necesario pa Gobierno contesta publicamente e siguiente preguntanan:
- Cua ta e zonanan exacto caminda vacation rentals lo ta permiti?
- Cua ta e fundamento pa exclui otro barionan?
- Cuanto propiedad den e zonanan permiti ta den man di residentenan local y cuanto di no-residentenan?
- Kico lo pasa cu inversionistanan local cu ya a inverti placa den nan propiedad?
- Gobierno a haci un estudio di impacto economico riba empresarionan chikito y hobennan?
Turismo ta e pilar di nos economia y e oportunidad pa participa den dje mester ta accesibel pa nos propio pueblo. Gobierno mester demostra cu e maneho nobo aki no ta crea un sistema caminda oportunidad economico ta concentra den man di un grupo limita!
