A raiz di e noticia cu ta menciona Marlon Sneek como candidato pa e cartera di Infrastructura y Telecomunicacion, parlamentario Jennifer Arends-Reyes kier aclarea cu e informacion aki no ta corecto.
“Te awor a discuti den fraccion ken tin interes pa ocupa un cartera ministerial, no a tuma decision pa ningun hende. Pone un nomber den publico como candidato por crea un impresion cu ya tin un proceso of un acuerdo, pero esey no ta e caso,” Jennifer Arends-Reyes a declara.
E ta enfatisa cu decisionnan tocante candidatura pa un puesto ministerial mester wordo trata cu seriedad y respet, y comunica na momento cu tin un decision formal.
“Mi ta pidi pa no presenta speculacion como hecho. Ora tin un decision, e lo wordo comunica di forma cla,” Jennifer a agrega.
Pa Jennifer, ta importante pa e publico ricibi informacion corecto y pa no crea incertidumbre rond di un tema cu ainda no a wordo trata ni dicidi.
