Otmar Oduber: “Si Gobierno por a duna incentivo fiscal pa construi hotel, pakico no por haci mescos pa yuda nos propio pueblo haya un cas?”
Mientras miles di ciudadano ta enfrentando dificultad pa haya un tereno of construi nan propio cas, Partido Patriotico di Aruba (PPA), bou di liderazgo di Otmar Oduber, ta presenta un proposicion concreto pa alivia e carga financiero di e famianan Arubiano: Introduccion di un Tax Holiday riba construccion di vivienda, cu por reduci e costo total di construccion cu casi 10%.
Segun Oduber, e crisis di vivienda na Aruba a yega un punto, caminda simplemente reconoce e problema ya no ta suficiente. Gobierno y Parlamento mester pasa di palabra na accion, cu e medidanan cu realmente ta haci diferencia den bida di ciudadano.
Exoneracion di impuesto pa e casnan te 120 meter cuadra
E proposicion di PPA ta contempla un incentivo fiscal special pa construccion di cas, cu un superficie di maximo 120 meter cuadra, cu un costo di construccion di te Afl. 2.800 pa meter cuadra.
E Tax Holiday lo inclui exoneracion di tres carga fiscal importante:
- Overdrachtsbelasting: impuesto relaciona cu transferencia di propiedad di tereno.
- Invoerrechten: derecho di importacion riba e materialnan di construccion.
- BBO: impuesto riba benta di e productonan y materialnan necesario pa construi e vivienda.
Segun Oduber, combinacion di e medidanan aki por representa un reduccion di casi 10% den gasto di construccion, dependiendo di e situacion particular.
Pa un cas di 120 meter cuadra na Afl. 2.800 pa meter cuadra, e costo di construccion di referencia ta Afl. 336.000. Un reduccion di 10% lo representa aproximadamente Afl. 33.600 di alivio financiero pa un famia, si por realisa e beneficio completo.
“Si nos a hacie pa hotelnan, nos por hacie pa nos pueblo”
Oduber a recorda cu Aruba anteriormente a introduci incentivo fiscal pa stimula inversion den industria turistico, cu resultado positivo pa desaroyo hotelero.
“Si nos por a crea condicionnan special pa e inversionistanan internacional, no tin motibo pa no considera e mesun instrumento pa nos propio ciudadano, cu ta luchando pa construi un hogar”, ta e argumento central di Oduber.
E lider di PPA ta enfatisa cu un cas no ta un luho, sino un elemento esencial pa stabilidad familiar, independencia y futuro di nos hobennan.
E hoben- y famianan no por sigui warda
Oduber a expresa su preocupacion profundo pa e parehanan hoben, e profesionalnan cu ta regresa Aruba despues di nan estudio, mama y tata soltero cu, a pesar di traha, no por cubri e costo di un vivienda propio.
Hopi ta obliga pa sigui biba cu nan mayornan, rumannan of otro familiar, mientras prijs di tereno, material y construccion ta sigui representa un barera financiero.
El a recorda cu, segun su declaracion, e decisionnan tuma durante su periodo como minister di Infrastructura a contribui na otorgamento di mas di 2.300 tereno den e añanan posterior. Pa Oduber, e ritmo actual di otorgamento di tereno tambe mester examina y acelera.
Eduard Pieters lo hiba e proposicion Parlamento
PPA no kier laga e iniciativa solamente como un declaracion publico. Oduber a anuncia cu e lider di fraccion parlamentario, Eduard Pieters, lo sigui impulsa e proposicion durante e proximo tratamento di presupuesto, mediante debate, mocion y si ta necesario, amiendan.
E partido ta invita Gobierno pa evalua e posibilidad financiero y huridico di e Tax Holiday, incluyendo e impacto riba ingreso fiscal y e beneficio directo pa ciudadano.
Oduber ta sostene cu mas construccion tambe por genera actividad economico, empleo y ingreso pa Gobierno a largo plazo.
Segun Oduber: “No ta importa ken ta den Gobierno of ken ta den oposicion. Loke ta importa ta cu nos pueblo ta haya e oportunidad pa construi un cas di nan mes.”
Cu e propuesta aki, PPA ta pone un alternativa concreto riba mesa y ta desafia Gobierno pa considera si incentivo fiscal, cu anteriormente a uza pa desaroyo economico, por ta aplicabel awor pa atende un necesidad social urgente: un hogar accesibel pa e famianan di Aruba.
