Marko Espinoza cu a “basha bao” riba Speed tambe ta den corte
Diamars mainta 9.30, e caso di hortamento di radio di polis, y scuchamento di conversacion di polis ta sigui den hogerberoep.
Dia 15 di Juli 2019, Nelson Speed Andrade a wordo sentencia dor di huez y a wordo haya culpabel di a horta radio di polis y tabata tin esaki den su poder, of tabata duna instruccion na otronan pa carga e portofoon y scucha conversacion di polis.
Ministerio Publico a cuminza for di 2018 cu caso Kini Kini, cu tabata dirigi pa busca esnan cu tabata cumpra o paga polis, pa haya acceso na radio di polis.
E investigacion tabata dirigi riba Nelson Andrade y Marko Espinoza y un polis cual su nomber a cay di tabata esun cu tabata saca e radio y facilita nan e radio.
E tempo ey, ora cos a bira cayente, cu hopi “speed” a core entrega e radio bek y a core pone e radio bek den warda di polis. Sinembargo hopi laat, pasobra ya a sigui e radio via GSM y tabata por a monitor unda e radio tabata, cu e tabata na cas di Nelson Andrade, na cas di Marko Espinoza y na cas di otronan. Tur e trahadornan di e website a wordo interoga.
Maske Nelson Andrade a nenga e acusacion, nunca el’a spera cu Marko Espinoza lo basha bao y admiti tur cos y conta recherche tur cos.
Tabata un baño di awa friu Nelson Andrade a haya, cu Marko a canta manera lora. Ta di compronde cu Marko tabata hopi spanta y no kier a carga ningun culpa pa su hefe.
Dia 15 di juli 2019, ambos a haya nan sentencia.
Huez a dicta cu ta legalmente proba cu tanto Andrade como Espinoza a wordo haya culpable di e actonan di ladronicia y heling. A sentencia ambos persona conforme e peticion di fiscal, cu ta trabao comunitario, esta 240 ora pa Andrade y 180 pa Espinoza. Si nan no cumpli cu e sentencia, tin castigo di prison di 120 y 90 dia respectivamente.
Diamars awor pa 9.30, nan ta bek den corte pa bolbe trata e caso.
Notabel ta cu e dosnan aki ta trece nan noticia, lastrando tur hende na Aruba. Hasta nan tin curashi pa yama otro hende drechi pa ladron, lubidando cu nan mes tin sentencia di huez cu ta haya legalmente proba cu nan a horta radio di polis.
Awor ta warda pa wak kico corte di apelacion lo dicta. No por descarta cu corte di apelacion por duna nan tambe mas castigo.
