Riba 16 di februari 2022 a reuni pa prome biaha Secretario di Estado Alexandra van Huffelen cu e tres representantenan mas grandi di cuido na Aruba esta Jacco Vroegop di Horacio Oduber Hospital, Joël Rajnherc di Ambulance y Imsan y Joaquin van Trigt di HAVA (Asociacion di Dokternan di cas).
A papia ampliamente tocante e cuido na Aruba y su relacion cu politica y con e unico seguro di cuido medico riba e isla ta hinca den otro. Tambe e importancia di por brinda bon cuido y di calidad, no solamente pa e comunidad di Aruba, pero tambe pe turismo cu ta un fuente di entrada pa cuido medico tambe. A pone enfasis cu alfinal nos ta un isla rondona cu awa locual ta limita opcion di cuido medico otro caminda y pues esaki tambe ta pone mas peso riba e gastonan di cuido medico.
A toca e tema di e presion creciente riba e sistema medico pa loke ta e ilegalnan riba e isla, e aumento extremo di gastonan di transporte y compra causa pa Covid-19 y e cortamento impactante y continuo riba cuido medico. Un punto di escohencia cu a wordo haci pafo di tereno di cuido cu ta pone presion inmenso riba e oferta, cantidad y tambe calidad di cuido.
Tabatin oido sigur di parti di sra. Van Huffelen y tambe preguntanan critico tocante colaboracionnan, e tema di vacuna di Covid-19 y a papia tambe tocante cuido di prome linea. Alabes e aviso tambe cu tin masha hopi reto pa Aruba. Decisionnan pa pais Aruba ta dificil pa tuma, cu cada decision lo tin su impacto tur caminda y cu alfinal e sosten di Hulanda tambe conoce su limitenan. Hopi sector lo tin un tempo dificil yena cu reto nan dilanti pero cu trahando hunto nos por logra hopi. Un reunion sigur fructifero cu a duna un bista amplio di cuido medico na Aruba en general y tur e retonan cu Covid-19 a trece cune.
