E hoben politico cu ta lidera e lista berde ta lamenta cu despues di tur recurso y tempo cu AVP a hinca pa pone Aruba riba e caminda di sostenibilidad esaki no a sigui su curso, asina mr. Wendrick Cicilia a duna di conoce. E ta bin cu e tema aki dilanti despues cu el a tuma nota di un carta di Utilities Aruba, unda cu el a duna gobierno di Aruba su conseha riba e deal di LNG. Cicilia ta conclui cu e situacion di Aruba ta preocupante. “Pa decisionnan motiva pa e Gobierno actual Aruba a keda stagna den transicion energetico pa 20 aña, mientras e comunidad internacional ta sigui intensiva nan esfuerso pa sigui implementa proyectonan di energia renovabel (Green Energy). Pa cuminsa e ta bisa cu un cambio di maneho energetico ta fundamental pa Aruba, y mester re-evalua e deal di LNG y expone locual ta scondi. Esaki pa libera Aruba di un deal cu ta perhudica nos presente y futuro generacion. “Nos tin recursonan natural manera biento, solo y lama cu nos por capitalisa riba dje como fuente di energia pa asina bira independiente di combustibel fosil y na mesun momento reduci prijs di utilidad pa nos comunidad.”
Track-Record di AVP su maneho di energia
AVP den su gobernacion a pone un bon nomber pa Aruba riba e tereno di energia renovabel. A pone e vision di “One Happy Sustainable Island” y lo renicia esaki. E meta ta pa sigui inverti den proyectonan di energia alternativo uzando technologianan berde cu ta produci energia for di biento, solo y awa. E parke di molina na Vaderpiet y parke di panel solar na aeropuerto, ehempel di e maneho di AVP den pasado, ta percura pa 23% di e produccion di energia. Esaki ta ehempelnan tangibel di inversion den un transicion energetico y independencia energetico. “Adicional AVP a inicia proyectonan di panel solar riba dak di scolnan manera Kudawecha y tambe edificionan publico manera centro di gobernacion y casnan di adulto mayor pa asina nan por produci nan mesun energia y reduci gastonan di utilidad. E ta un desaroyo innovativo, moderno y prometedor pa Aruba. Proyectonan grandi a wordo combina cu maneho micro pa introduci incentiva fiscal pa auto electrico cu ta wordo someti na un tarifa di 2% di invoerrechten, cambio di 12 000 palo di luz pa LED y stimula proyectonan di sostenbilidad den e sector turistico pa duna contenido na un vision energetico sostenibel pa Aruba.
E gobierno di e ultimo shete añanan no a haci nada riba e tereno y aki y mirando e avancenan na momento, ta momento pa Aruba urgentemente cuminsa amplia su inversionnan den e capacidad di produccion di energia for di fuentenan renovabel manera solo, biento y awa pa minimalisa Aruba su dependencia di combustibel fosil. “E vision aki a keda stagna pa mas cu 7 aña bou di e Gobierno actual. “
E tin tur speransa cu e “Investeringfonds”, cu AVP ta bay propone, lo produci e recursonan financiero pa carga e vision di un Aruba sostenibel energeticamente” E fondo cu ta papia di dje ta e debe di pandemia cu AVP lo propone pa converti esaki den un fondo pa inversion strategico pa Aruba. Esaki ta di vital importancia pa Aruba pa por sigui carga e vision di ta un Pais sostenibel e independiente energeticamente. “Nos lo crea e espacio financiero den presupuesto di Gobierno di 900 miyon pa haci inversion den transicion energetico di Aruba cu mas parke di molina di biento, panel solar ariba edificionan priva y publico y sigui evalua e posibilidad di energía for di wave-energy technology.”
AVP y Cicilia ta pensa den amplia Aruba su capacidad pa entrega proposicion pa bini na remarca pa fondonan di Nationale Groeifonds y SDE-Middelen.
E ta kere cu e bon relacion den Reino Hulandes ta duna Aruba e oportunidad pa sigui inverti y mehora e calidad di bida di nos hendenan. “Nos mester inverti den aumenta nos capacidad di Gobierno y departamentonan pa asina presenta proyectonan na Hulanda pa asina nos por ricibi sosten financiero pa sigui diversifica nos economia y inverti den energia renovabel. E fondonan di Nationale Groeifonds (200 miyon pa e islanan CAS) y SDE-Middelen ta brinda Aruba e oportunidad pa sigui inverti den proyectonan cu ta impulsa producion di energia for di fuentenan limpi y renovabel.”
AVP ta kere den capitalisa riba e potencial di nos Pais, locual e Gobierno actual no a haci. Den Gobierno nan lo sigui inverti den sostenibilidad energetico di nos Pais y continua cu e vision di energia berde pa Aruba. mr. Wendrick Cicilia ta bisa, AVP ta haci e compromiso pa sigui impulsa energia alternativo uzando tecnologia di energia renovabel pa sigui reduci emision di gasnan toxico pa nos medio-ambiente, combati cambio climatologico y crea un pilar economico nobo cu ta genera oportunidadnan nobo pa “Young Professionals y profesionalnan den e area di ingenieria, sostenibilidad y technolgia”. Nos no por warda mas, e momento ta awor!”
Tocante Wendrick Cicilia
mr. Wendrick Cicilia ta un hoben hurista y candidato di Partido di Pueblo Arubano (AVP). Prome cu el a drenta política, a traha den banco y oficina di abogado. Su pasion pa yuda su prohimo a hib’e na ta un di e fundadonan di Tienda di Ley na 2018. El a gradua na 2019 for di e Facultad di Derecho di Universidad di Aruba. Na 2021 a tuma e curashi y determinacion pa subi e lista berde. Durante e ultimo eleccion mr. Wendrick Cicilia a logra convence 482 ciudadano cu nan voto, profilando su mes den e top 10 cu mas voto di tur e 29 candidato rib’e lista di AVP. For di 2021 e ta consehero legal di e fraccion AVP den parlamento. Na october 2024 el a logra su titulo di meester in de rechten. Dia 18 october 2024 el a bira lider di e lista di AVP, pues e lijsttrekker mas hoben den historia di Aruba.
