Durante e conferencia di prensa semanal di Partido di Pueblo Aruba (AVP), tabata un prioridad pa parlamentario Clifford Heyliger pa papia tocante e situacion fastioso reinando den e companianan estatal. E ta un profesional y sindicalista cu trayectoria di mas cu 30 aña na nos compania di awa, prome cu a drenta arena politico. E sa di kico e ta papia y nan no por bin bend’e un 6 pa un 9.
Heyliger a haci distincion di e diferente asuntonan andando, cuminsando cu e persecucion politico riba director di WEB Aruba N.V. y e reaccion di parti di sindicato pa menasa di bay den accion si kita Alfredo Koolman di su funcion. Echo ta, segun e parlamentario, cu Koolman tin añanan ta lucha contra gerencia y hunta di comisario di WEB y Utilities.
Na 2022 Utilities Aruba a saca un Expression Of Interest (EOI) pa un parke di molina di biento na Rincon riba su mes desviando di e procedura normal. Sindicato di WEB (VWI) a pidi na september di e mesun aña un audiencia cu gobernador y cu comision fiho di Parlamento, sin haya reaccion di ningun. VWI kier a splica cu Utilities tabata actuando contra statuut.
Un luna despues, VWI hunto cu Comerciantenan Uni Aruba (CUA) a manda carta pa Minister President y pa Presidente di Parlamento pidiendo un reunion pa discuti e tema. Aki tampoco a haya contesta. E grupo a pidi hasta pa comision di Corporate Governance haci un investigacion, pero a ser ignora pa Gabinete Wever-Croes II. No a resta VWI nada otro cu entrega un dossier na ministerio publico.
Segun VWI Utilities Aruba NO tin e meta, ni autoridad pa tene un destaho pa molina di biento pasobra e ta en pugna cu e Corporate Governance entre UA y WEB. VWI a bati alarma cu e proceso no ta transparente y tabatin sospecho di iregularidad. Fuera di no a haya oido cerca gobernador, parlamento y gobierno, ministerio publico tambe a duna VWI un cara abou argumentando cu VWI no ta un partido cu interes den e asunto (belanghebbende).
Casualmente, un tempo despues cu e sindicato a purba di entrega keho, Utilities Aruba N.V. a pone un stop riba e EOI, dus a para e proyecto. “Awo, lo bo kere cu esaki lo a yuda nan comprende cu tin regla y cu nan mester wanta nan mes na regla,” Heyliger a bisa sarcasticamente ya cu, nan no a desisti di nan obhetivo, pero a opta pa cambia statuto di UA y di WEB, mescos cu awo tambe a cambia esun di hunta di comisario pa beneficia nan cu nan mes. Loke ta sosodiendo na Utilities y den hunta di comisario di WEB ta un refleho di e mentalidad corupto y egoista di MEP, caminda nan bienestar personal ta bin prome cu esun di Aruba.
Heyliger: “Na fin di dia, e mal maneho aki ta afecta comercio y cada un di nos den nos bida diario. Nos por wak den falta di inversion cu ta hiba na fayo di servicio. Esey ta cosnan cu nos no por permiti, ni acepta. No por keda keto y laga e cosnan aki sigui pasa”.
