Kralendijk– Aliansa pa Naturalesa di Caribe Hulandes ta expresa su preocupacion pa falta di atencion pa asunto relaciona cu e impacto di Cambio di Clima den Caribe Hulandes na Den Haag. A pesar cu prome minister Hulandes Mark Rutte a menciona e impactonan di cambio climatico den Caribe Hulandes durante su intervencion na Asamblea General di NU na september, tabatin masha poco accion concreto y apoyo pa loke ta bay ta e crisis mas critico cu e habitantenan di Caribe Hulandes lo enfrenta den futuro cercano. E declaracionnan di e red regional di conservacion a keda produci den vispera di apertura di CoP26 teni na Glasgow, Escocia, di prome pa 12 di november.
“Tabata di aprecia si cu e politiconan Hulandes a menciona e cambio climatico ultimamente, pero ainda nos ta bastante preocupa cu ta prestando masha poca atencion na e impacto cu e cambio climatico lo tin den e parti Caribense di Reino, aunke ta cla cu esunnan cu ta biba den Caribe, e punto critico di biodiversidad di Reino, ta na vanguardia di e crisis climatico ”, director di DCNA, Tadzio Bervoets, a comenta.
Sr. Bervoets a sigui menciona cu durante e reunionnan teni recientemente cu varios parlamentario y directiva na Hulanda, DCNA a enfatisa e crisis existencial provoca pa e clima cambiante; “Nos mester a recorda politico, burocrata y tecnocrata na Den Haag cu e diferente acuerdonan y convenionan relaciona cu cambio climatico ta wordo ratifica door di Reino Hulandes y no solamente door di Hulanda, y como tal mester tin un mayor enfoke pa garantisa cu e islanan ta miho ekipa pa enfrenta loke ta mustra di bira un crisis existencial. Incluso nos mester a splica cuestion manera aumento di horcan, blankiamento di coral, invasion di sargassum y secura na esnan cu nos a asumi di ta experto den cambio climatico cu no tabatin ningun idea di e impactonan aki. Esaki ta tanto decepcionante como alarmante ”, Sr. Bervoets ta continua.
E prediccionan mas recien di cambio di clima pa region di Caribe realisa pa e Panel Intergubernamental riba Cambio Climatico (IPCC) ta alarmante y ta sugeri cu e islanan di Caribe Hulandes lo pasa den cambio ambiental impactante den e proximo decada. IPCC a pronostica cu pa e Region di Caribe un aumento den temperatura di aire di 1.4 ° C lo resulta den un disminucion den yobida di 5 pa 6%; un aumento den frecuencia e intensidad di evento climatico extremo, incluyendo un aumento di 66% den e intensidad di horcan; y un aumento di nivel di lama di 0,5 a 0,6 m como resultado di expansion termico di awa y js cu ta smelt di e gletsjernan.
![](https://solodipueblo.com/wp-content/uploads/2021/10/Photo2_NOAA_Irma.png)
E prediccionnan aki di cambio climatico ta specialmente preocupante den contexto di un tendencia di calentamento cu ya ta bisto. E temperatura medio den Caribe Hulandes ta aumentado considerablemente durante e ultimo 40 añanan, segun dato recien, un investigacion haci pa Departamento Meteorologico a descubri cu durante e ultimo decada e isla a experimenta progresivamente mas dia calor y menos nochi friu na Corsou. Debi cu e islanan di Caribe Hulandes ta forma dos grupo geograficamente distinto separa pa mas di 900 km di awa habri, ta spera cu e cambio climatico no lo afecta a dos grupo di islanan di e mes manera. Aruba, Boneiro y Corsou ta keda den Caribe Sur, un area cu ta predeci pa bira mas cayente y seco, cu periodo estacional seco mas prolonga. Ta predeci cu Saba, St. Eustatius y St. Maarten, cu ta keda den e noreste di Caribe y, por lo tanto, den e faha di horcan di Caribe, lo experimenta horcan tropical mas frecuentemente y mas violento, manera por a mira durante e temporada di horcan desastroso di 2017.
Tur ecosistema marino y terestre di Caribe Hulandes y e especienan cu ta biba lo ser afecta den diverso grado. Ta predeci cu e rifnan di coral lo ta specialmente vulnerabel ya cu e temperatura di ocean mas halto y e acidificacion di ocean indudablemente lo duna como resultado blankiamiento masivo di coral, entre otro cosnan.
E economia di e islanan di Caribe Hulandes tambe ta depende den gran parti di turismo y manera por spera e pilar economico unico aki tambe lo keda afecta drasticamente: aumento di tormenta y horcan por haci cu e turistanan ta mira e destino como insigur; erosion di e beachnan y e blankiamento di coral por afecta negativamente e percepcion di atractividad di e destino; lo tin mayor riesgo di daño na e propiedadnan di centro turistico na costa door di horcan violento y otro tormento y daño na e atraccionnan turistico; na Boneiro, e erosion di e beachnan debi na perdida di rif poco profundo ta laga e edificionan historico di plantacion manera esunnan di parke Washington Slagbaai vulnerabel.
Dutch Caribbean Nature Alliance (DCNA) a publica un edicion special di su boletin digital gratuito BioNews cu ta destaca desafio cu Caribe Hulandes ta enfrenta den lucha contra e clima.
Uzando prediccion y informe (di investigacion) tocante cambio climatico internacionalmente acepta, nan a defini e impactonan tanto riba como bou di awa pa e seis islanan, loke ta enfatisa e necesidad di un accion di biaha pa desaroya resiliencia contra e efectonan di cambio climatico. Perdida di naturalesa tin consecuencia negativo di gran alcance pa e poblacion local, ya cu naturalesa ta sirbi como un di e fuentenan di ingreso mas importante y ta ofrece proteccion contra e condicionnan climatico extremo. Sinembargo, lo ta necesario un esfuerso concerta pa garantisa cu naturalesa, bida y e medionan di subsistencia no lo perde debi na inaccion di e responsabelnan di tumadonan di decision.