Organisa pa Cosecha conhuntamente cu artista Fred Wijenberg
ORANJESTAD, ARUBA (November 30, 2020) – Mirando cu nos ta jegando fin di aña y nos ta consciente cu e aña aki tabata uno excepcional duro y hopi hende ta pasando den duro, Cosecha ta organisa un campaña di donacion cu e meta pa recauda fondo pa Fundacion Pa Nos Comunidad. E campaña ta uno online unda por haci donacion pa yuda cu e projecto di Food Bank.
Desde awe por cuminsa haci donacion riba website di Cosecha, campaña “Foodbank donations” (http://www.arubacosecha.com/foodbank). Lo tin oportunidad te cu 31 di Januari 2021 pa haci un donacion. Durante di e periodo aki, Cosecha ta spera di por recauda un suma substancial pa brinda na e manera aki un ayudo grandi na Fundacion Pa Nos Comunidad.
Pa haci e campaña aki mas atractivo artista local Fred Wijenberg a haci un donacion di e pintura “Serenity” pa por otorga como premio na e donacion di mas halto duna na e campaña aki. Nos ta bibando den tempo di crisis den cual Cosecha y Fred Wijenberg ta kere cu Arte Local tambe por contribui na alivia e efectonan negativo di e situacion actual di Covid-19.
Fred Wijenberg ta un di e pintornan cu ta bende via e tiendanan di Cosecha y ta conoci pa su pinturanan inspira door di Aruba. Su estilo ta varia entre abstracto y realistico.
“Serenity” ta un pintura den un size 40×60 cm riba canvas W&N Prof linnen y insipira door di momentonan di serenidad cu Fred ta experiencia durante caminatanan banda di laman. “Serenity” a wordo pinta cu hopi amor y pasion y den dos luna di tempo. Actualmente e tin un balor di AWG 1500 y riba e website di Cosecha por lesa hopi mas di e pintura.
Pa esunan cu kier bin admira e pintura “Serenity”, esaki lo ta exhibi den tienda di Cosecha Oranjestad te cu final di e campaña na unda tambe lo tin oportunidad pa por haci bo donacion. Cosecha y Fred Wijenberg ta agradeci di antemano pa tur esunan cu lo contribui na e bon causa aki.
Tambe ta existi e posibilidad pa hasi donacion riba cuenta di banco di Cosecha:
Fundacion Centro pa Reinforsa Artesania y Forma Talento (CRAFT)
Zoutmanstraat 1
Bank Account: 2575950190
Arubabank
Si hasi uso di online banking, pone “Donation Campaign Food Bank” como descripcion di e transaccion conhuntamente cu nomber y un number di contacto.
Pa mas informacion tocante e campaña di donacion aki of Cosecha, por tuma contacto cu Cosecha Oranjestad na telefoon 5878709. Tambe por bishita e Facebook page di Cosecha: www.facebook.com/Aruba-Cosecha pa informacion general.
