Parlamentario di AVP, ing. Carlos Bermudez, ta pidi claridad di e minister encarga tocante e situacion na Departamento di Progreso Laboral (DPL) y Directie Arbeid en Onderzoek (DAO).
Informacion cu el a ricibi ta indica cu tin preocupacion y insiguridad entre empleadonan di ambos departamento tocante un posibel reorganisacion y e consecuencianan cu esaki por tin pa nan trabou y posicion.
E situacion ta exigi atencion ya pa basta tempo.
Pa Bermudez, ta necesario pa personal haya informacion oficial tocante e futuro di e departamentonan, e structura cu ta contempla y e manera cu cualkier cambio por afecta nan funcion, tarea y responsabilidadnan.
Ademas di e preocupacionnan di personal, Bermudez ta ricibi señalnan di posibel obstaculonan organisatorio y operacional dentro di DPL y DAO.
E señalnan aki ta lanta preguntanan tocante e funcionamento di cierto procesonan di trabou y e impacto cu eventual deficiencianan por tin riba e servicio na ciudadano y empresanan.
Evaluacion y recomendacionnan
Bermudez a tuma nota di informacion cu a ehecuta un Quick Scan na DAO y DPL. Den e preguntanan cu e ta dirigi na Minister di Labor, Wendrick Cicilia, e ta solicita confirmacion di e status actual di e evaluacion: si esaki a conclui of si ainda e ta andando.
Tambe e ta pidi pa e minister indica si e ta dispuesto pa entrega Parlamento di Aruba e informenan completo, incluyendo nan conclusion y recomendacionnan, y na ki momento.
E parlamentario kier conoce e resultadonan principal tocante e structura organisatorio, procesonan di trabou, division di tareanan, ocupacion di personal y prestacion di servicio di ambos departamento.
E ta pidi claridad tambe si e evaluacion a inclui e funcionamento di gerencia, direccion y division di responsabilidad, y cua recomendacionnan a surgi riba e aspectonan aki.
Un otro punto ta cua obstaculonan concreto a constata y den ki grado nan ta afecta e trabounan diario y e servicio cu DPL y DAO ta brinda na comunidad.
Futuro y personal
Bermudez ta solicita pa Minister Cicilia aclara tambe si tin intencion di reorganisa of integra DPL y DAO, of di modifica nan tarea, responsabilidad of structura di un otro manera. Si tin cambionan contempla, e ta pidi pa splica concretamente kico nan ta encera, cua paso lo sigui y dentro di cua termino lo ehecuta nan.
E consecuencianan pa personal ta ocupa un lugar central den e preguntanan.
Bermudez kier claridad tocante e impacto cu eventual cambionan por tin riba e funcion, tarea, responsabilidad, posicion huridico y luga di cada empleado den e organisacion.
Tambe e ta pidi pa indica ki ora y na ki manera lo informa empleadonan oficialmente tocante e resultadonan di e evaluacion y un eventual reorganisacion.
Esaki ta inclui e manera cu lo consulta cu personal y nan representantenan y involucra nan den e siguiente fasenan di e proceso y su implementacion.
Cu e preguntanan aki, Bermudez ta busca claridad tanto pa Parlamento como pa e empleadonan di DPL y DAO. E meta ta pa cualkier paso pa mehora e funcionamento di e departamentonan tuma lugar cu informacion cla, participacion di personal y debido atencion pa e calidad di servicio cu comunidad ta ricibi.
