Dialuna mainta 9’or den Corte a trata e caso sumario cu Green Bike y E-Bikes a cuminsa contra Gobierno. Green Bike y E- Bikes su abogado a haci peticion na Hues pa ordena Gobierno no ehecuta e multa, si Green Bike y E-Bikes no cumpli cu e exigencianan cu Gobierno a manda pa nan.
SOLO DI PUEBLO por a compronde cu Hues a pospone e caso pa asina duna Green Bike y E-Bikes chens pa demostra cu documentonan, nan situacion financiero.
GOBIERNO A MANDA EXIGENCIANAN
Na Mei 2026, Hues den su sentencia di e caso di Green Bike y E-Bikes contra Gobierno, ta mustra cu dia 21 di April 2026, e Minister di Husticia a anuncia cu, di inmediato, ta prohibi pa uza e stepnan electronico riba caminda publico. Riba 29 di April 2026, un “Ultimo Aviso” di e Minister a wordo publica riba social media y riba 30 di April 2026, Gobierno a manda kita e stepnan electronico.
Hues a sigui bisa cu Corte ta dicidi cu e companianan di huur e stepnan electronico, na e momento aki no ta obliga pa kita e stepnan y e stacionnan di carga for di caminda publico.
Hues ta mustra cu aki tambe ta conta cu Gobierno mester prome manda un carta na e companianan cu e peticion pa nan kita nan propiedadnan for di tereno di Gobierno y esaki dentro di un tempo razonabel.
Hues ta mustra cu e decision aki no ta nifica cu e stepnan electronico por keda pa semper riba caminda publico.
Hues ta mustra cu naturalmente e companianan cu ta huur e stepnan electronico, mester atene nan mes na e reglanan vigente. Esey ta conta tambe pa e conductornan di e stepnan.
Ta asina cu Gobierno e biaha aki a cumpli cu e reglanan di ley y a manda exigencianan pa Green Bike y E-Bike.
PETICION PA SUSPENDE MULTA
E abogado di Green Bike y E-Bikes a pidi Hues pa suspende e multa cu Gobierno a stipula si Green Bike y E-Bikes no cumpli cu e exigencianan. E multa ta 500 florin pa cada step te na un maximo di 250 mil florin. Segun e abogado, esaki lo pone e companianan den situacion financiero dificil.
Di parti di Gobierno a wordo mustra cu e biaha aki Gobierno a cumpli cu tur e reglanan di ley y ta haya cu e companianan mester cumpli. E abogado di Gobierno a bisa Hues cu e companianan awor mester demostra cu pruebanan loke nan ta bisa y no djis bin bisa den Corte.
POSPONE CASO
Hues a dicidi cu ta duna Green Bike y E-Bikes un chens. Hues a bisa cu dia 27 Juli 2026, e companianan mester entrega e pruebanan di nan situacion financiero, a base di loke nan a expresa den Corte.
Hues a bisa cu Gobierno ta haya un periodo pa reacciona riba e cifranan y Hues ta fiha cu na Augustus 2026 lo por spera sentencia.
