Dialuna den careda di 11’or di mainta alarma a wordo bati pa un container cu basta material di e compania ASAP a pega candela. E container tabata na e warehouse di e compania ASAP. Den e container tabata tin basta material, manera wayanan di coriente, cabelnan etc.
Varios unidad di brandweer a dirigi nan mes na e sitio y a cuminsa combati e candela, hopi lihe nan a logra domina e candela y a paga esaki. Polis tambe a presenta na e sitio. E trahadornan di ASAP a bay para leu dunando brandweer espacio pa combati e candela. E huma tabata tin un holor basta fuerte pa motibo cu tin hopi cabel y diferente material cu a pega candela.
For di leu por a mira huma blanco bay halto.E warehouse di ASAP ta keda na Mahuma, un poco pariba di e cura di Airport. E compania ASAP ta haci varios trabou na Airport di Aruba.
