FASEvierend ten ondergaan: Iregularidadnan cu placa di FASE den maneho di MEP ta muestra cla y raspa: nos mester por miho: Segun Parlamentario John Hart (AVP)

Parlamentario di AVP, John Hart, ta expresa su preocupacion serio despues di e descubrimentonan presenta door di Algemene Rekenkamer Aruba (ARA) den su evaluacion di Cuenta Anual 2020 di Pais Aruba. Segun Hart, e hayazgonan rond di e programa di ayudo di emergencia FASE ta confirma cu durante e periodo di pandemia tabatin falta serio di control, supervision y documentacion den e maneho di fondonan publico. Ta papia aki di un total di casi 43 miyon florin.

E informe di ARA ta señala varios iregularidadnan den e proceso di aplicacion, evaluacion y pago di e ayudo FASE. Entre otro, e organismo di control ta conclui cu no tabatin suficiente mecanismo pa preveni pago dobel, ni suficiente verificacion di identidad di solicitantenan. Tambe a constata cu durante e ehecucion di e programa, diferente procedimentonan a cambia sin cu esakinan tabata documenta formalmente, debilitando e controlnan interno necesario pa garantisa un maneho responsabel di recurso publico.

Segun Hart, e informe ta mustra cu e responsabilidad pa procesa e pagonan inicialmente tabata bou di Departamento di Asuntonan Social (DAS), pero posteriormente a transferi pa Departamento di Finansa pa medio di e sistema di payroll. Sinembargo, ARA ta indica cu e transicion aki no tabata formalisa adecuadamente, creando riesgo adicional pa erornan administrativo y pago indebido.

Ademas, ARA ta señala cu no tabatin un procedura formal y documenta pa pagonan cash na beneficiario cu no tabatin cuenta bancario, algo cu por afecta transparencia, trazabilidad y rendicion di cuenta den e uso di fondonan publico.

“E hayazgonan di ARA ta hopi serio y merece atencion completo di Parlamento y di comunidad. Nos ta papia di casi 43 miyon florin di fondo publico durante un di e periodonan mas difícil di nos historia. E exigencianan di control, transparencia y responsabilidad mester tabata mas halto, no menos,” Hart a declara.

Parlamentario Hart a recorda cu representantenan di Algemene Rekenkamer a presenta nan observacionnan na Parlamento dia 18 di mei 2026. Segun dje, e contenido di e informe ta contene preguntanan importante cu ainda mester contesta.

“E resultadonan den e jaarverslag 2020 ta dificil pa ignora paso ta papiando di casi 43 miyon florin. E iregularidadnan y posibel abuso menciona den e informe ta di tal gravedad cu un continuacion di e reunion cu Algemene Rekenkamer ta absolutamente necesario. Nos ta pendiente awor pa Presidente di Parlamento convoca e siguiente encuentro pa profundisa den e asunto aki y determina con nos por evita cu situacionnan similar ripiti den futuro,” Hart a conclui.

Segun e parlamentario di AVP, e les principal cu Aruba mester saca for di e episodio aki ta cu bon gobernacion, control financiero fuerte y transparencia no ta opcionnan, sino condicionnan esencial pa mantene confianza publico den gobierno y den e maneho di placa di pueblo.