Durante un ceremonia special cu a tuma luga diamars atardi den Bernhardstraat, a marca un paso importante den proteccion y restauracion di patrimonio religioso na Aruba.
E actividad a reuni representante di gobierno, comunidad y iglesia pa conmemora e historia di e edificio y celebra e inicio oficial di su proceso di restauracion. Den e marco di e ceremonia, a realisa colocacion di e seyo di monumento protegi y firma di un acuerdo importante pa garantisa e continuidad di e proyecto.
E programa a cuminsa cu un bonbini di Pastor Pablo Lake como maestro di ceremonia, sigui pa un presentacion di e antecedentenan historico di Luciano Milliard. Posteriormente, Calix Ashby a ofrece un bista di e proyecto di restauracion, resaltando e importancia di cooperacion pa haci esaki posibel.
Durante e ceremonia, Pastor Virgil Sams a dirigi su mes na e comunidad, incluyendo un reconocimento special na Eric Principaal pa su dedicacion y contribucion duradero durante casi tres decada na desaroyo y fortalecemento di e comunidad di Bernhardstraat.
Prome Minister Mike Eman tambe a hiba palabra, enfatisando e importancia di preserva patrimonio como base di identidad nacional y desaroyo di comunidad.
Un momento simbolico di e actividad tabata e colocacion di e seyo di monumento protegi, realisa pa Prome Minister Mike Eman hunto cu Pastor Sams y Raul Gei, sigui pa e firma oficial di e acuerdo cu lo guia e proceso di restauracion.
E ceremonia a sigui cu un oracion pa e proyecto y comunidad, lidera pa Pastor Wilson Navarro, y a conclui cu un momento di celebracion.
E iniciativa ta forma parti di un esfuerso mas amplio pa revitalisa Bernhardstraat. Riba 30 di januari 2026, durante e conferencia di Bon Comun, Stichting Revitalisation Bernhardstraat a wordo estableci oficialmente, como meta busca sosten y cooperacion pa transforma e area den un comunidad mas fuerte y harmonioso.
E progreso den Bernhardstraat ta refleha e vision di Bon Comun, promovi pa Prome Minister Mike Eman, cu ta pone comunidad como prioridad. Cu e creacion di e fundacion, e vision aki a bira accion concreto, enfoca riba cooperacion, renobacion y fortalecemento di comunidad.
Den e mesun linea, varios iniciativa di embeyecemento realisa, incluyendo pintura di edifisionan y cas den e area. Ademas, un mural na honor di musico Arubiano Julio Bernardo Euson inaugura na edifisio Chocolate City na San Nicolas, como parti di celebracionnan nacional di 18 di maart.
Cu e paso aki, Bernhardstraat ta drenta un fase nobo di desaroyo, unda restauracion di patrimonio ta bay man den man cu fortalecemento di comunidad. E colaboracion entre gobierno, iglesia y comunidad ta mustra cu, ora tin compromiso y vision, cambio positivo ta posibel.
