Dia 14 di september ultimo, e programa di investigacion “Islanan/Isleñonan na Timon”, a tene su prome encuentro ‘online’ cu partnernan social y otro ‘stakeholder’ den Reino Hulandes. Esaki ta e comienso formal di un colaboracion di cinco aña cu ta trece investigadornan y partnernan social hunto pa usa practicanan di conocemento tecnico, tradicional y contemporario pa studia adaptacionnan na cambionan climatologico. Trahando hunto, e programa menciona lo co-crea solucionnan sostenibel y inclusivo pa adaptacion social na retonan climatologico den Caribe (Hulandes).

E trinta participantenan cu ta representa un diversidad di organisacion di e seis islanan den Caribe Hulandes a intercambia idea pa colaboracion. Nan a enfatisa e importancia pa considera practicanan di arkitectura tradicional, e impacto di catastrofe climatologico riba salud mental, e rol di muchanan y pa involucra comunidad den diseño di investigacion. Metanan di e colaboracion ta pa hasi e investigacionnan hunto cu e isleñonan y pa e proyecto fortalece e infrastructura di conocemento den Caribe Hulandes. Pesey ta traha mas tanto cu persona cu rais den Caribe (Hulandes). E speransa ta cu e colaboracion intensivo lo conduci na iniciativanan pa desaroyo comunitario y coherencia social entre organisacionan (no)gubernamental, y e resto di sociedad civil. Un otro resultado lo por ta fortifica e realisacion di e importancia di adaptacion relaciona cu cambionan climatologico. 

Miembronan mas nobo di e ekipo di investigacion a presenta nan proyecto pa obtene un PhD. Harold Kelly, di Museo Arqueologico Nacional Aruba (MANA), a presenta su investigacion arkeologico riba adaptacionnan social di retonan climatologico y habitacion den Caribe. Harold a splica cu e lo investiga con desde e prome habitantenan te awendia, personanan a adapta na situacionnan nobo di naturalesa y cambionan climatologico y con esaki a afecta nan bida diario. Secura, horcan, inundacion y tsunami ta afecta unda hende ta ubica y con nan ta yega na awa y cuminda. E enfoke di su investigacion ta riba Caribe Hulandes, y lo cuminsa na Aruba, e isla mas seco den Caribe. Harold lo colecta entre otro dato for di investigacion di sitionan arkeologico, di excavacionnan y e lo analisa informacion existente. Su investigacion lo identifica e registro arkeologico, cual lo hunga un rol den e proyecto ‘Island(er)s at the Helm’ pa contribui na desaroyo di solucionnan inovativo y sostenibel contra e cambio climatologico di awendia y den futuro. 

Na Universidad di Sint Maarten Lysanne Charles lo traha riba un plan pa co-crea un mapa di maneho y strategia pa Sint Maarten, Saba y Statia. Sharelly Emanuelson a conta di su proyecto tocante disasternan di naturalesa y tempo liber den Caribe Hulandes, riba cual investigacion e lo traha na KITLV-Hulanda.

E programa di investigacion a cuminsa e luna aki cu un ekipo transdisciplinario cu ta consisti di lider di e programa Dr. Francio Guadeloupe (University of Amsterdam/KITLV), co-aplicantenan Prof. dr. Corinne L. Hofman (Leiden University/KITLV) y Dr. Antonio Carmona Báez (University of St. Martin); candidatonan PhD Lysanne Charles, Sharelly Emanuelson y Harold Kelly; coordinador di comunicacion cientifico y participacion comunitario Tibisay Sankatsing Nava y manager di proyecto Emma de Mooij. Na januari 2022, 6 investigador postdoctorado lo uni na e programa di investigacion y un evento oficial pa su lansamento lo tuma luga den Caribe.

Resultadonan di e reunion teni lo ser incorpora den e diseño di investigacionnan relaciona cu Isleñonan na Timon. Esaki lo contribui pa traha colaboracionnan riba termino largo entre e investigadornan y partnernan social riba e seis islanan na unda investigacion lo tuma luga. A clausura e prome reunion cu un invitacion habri pa partnernan social pa colabora den e programa ‘Island(er)s at the Helm’.

LEAVE A REPLY

Please enter your comment!
Please enter your name here