Parlamentario Darlaine Guedez-Erasmus (MEP): 

Desde algun tempo caba ta biba un preocupacion di e cantidad di persona pafo di Directie Sociale Zaken na San Nicolas. Mayoria ta cliente di bijstand y na momento cu nan yega eynan, nan tin cu sinta warda den calor.

Desde diaranson 16 di februari 2022 tin cambio. Tur persona cu kier haci un peticion nobo pa bijstand of cambio mester avisa e seccion di Bijstand di esaki online, esta riba www.das.aw. Pero a tene cuenta cu e personanan cu no ta den posesion di un computer, laptop of tablet, pasobra tin e posibilidad pa entrega e documentonan necesario na seccion di Bijstand. Aki tin dos kiosco disponibel, cu ta DAS Eagle y DAS San Nicolas. E ta importante pa menciona cu e proceso online ta bay mas liher cu papeleo, p’esey ta haci un peticion na tur cu por yuda asisti un persona cu no tin acceso of no por domina e mundo online pa please haci esaki. 

Algun informacion interesante tocante nos grupo di bijstand ta cu e cantidad di persona cu ta ricibi bijstand ta 2763. Di e cantidad aki 1417 ta gezinsbijstand (bijstand pa famia). Den e grupo aki, 55% di e persona tin mas cu 5 aña ta ricibiendo esaki. Esaki ta un grupo grandi y mi ta sinti e urgencia pa tuma e pasonan necesario pa yuda e famianan aki recupera nan independencia economico.

Actualmente Gobierno di Aruba ta trahando incansabelmente pa stimula nos economia y cuminsa foritifica esaki door di crea cuponan di trabou. E ta importante cu na momento cu ta cuminsa crea cupo di trabou tene e grupo di bijstaand na cuenta y stimula nan di un manera of otro pa drenta e mercado laboral bek y pa keda den e mercado laboral tambe. Bijstand ttin como meta pa ta un ayudo temporario pa cubri gastonan tanten cu bo ta/por haya bo trabou bek y sigui funciona independiente como ser humano.

Drentando e mercado laboral lo causa un impacto positivo riba e persona su sentimento di independencia, su situacion financiero y lo empodera e persona y su famia. Esaki lo trece oportunidadnan nobo y prominente pa e desaroyo y stabilidad di e famia. 

LEAVE A REPLY

Please enter your comment!
Please enter your name here