Evaluacion independiente ta confirma cu e caminda di colaboracion y responsabilidad propio a duna resultado positivo
Durante e reunion di Tripartiet na Hulanda, parlamentario Eduard Pieters di fraccion di PPA a expresa satisfaccion cu e resultado di e reciente evaluacion di e Landspakket. Tabata un evaluacion independiente cu, segun Pieters, ta confirma algo cu Aruba, Corsou y Sint Maarten a bin defendiendo desde prome dia: reforma no mester bay man den man cu un Rijkswet.
E prome punto riba agenda tabata precisamente e evaluacion di e Landspakket, e pakete di e reformanan cu a nace despues di e pandemia di COVID-19, ora cu e paisnan di Caribe Hulandes a busca apoyo financiero pa supera un di e periodonan economico mas dificil den nan historia reciente.
Un otro caminda cu a funciona
Pieters a recorda cu originalmente Hulanda kier a mara e reformanan na un Rijkswet. Sinembargo, Aruba, Corsou y Sint Maarten a para firme cu e reformanan mester ta ehecuta via cooperacion y responsabilidad comparti, no via imposicion constitucional.
Despues di hopi negociacion, e paisnan a logra aplica articulo 38 inciso 1 di Statuto y sigui cu un ‘Onderlinge Regeling’, permitiendo cu cada pais ta mantene ‘ownership’ di su propio proceso di reforma. “Awe despues di 6 aña nos por mira cu e decision ey tabata esun corecto,” Pieters a declara.
Evaluacion independiente ta duna credibilidad
Segun Pieters, e evaluacion no a wordo haci solamente door di esunnan involucra den e proceso, sino tambe tabata revisa y analiza door di experto independiente.
Precisamente esaki, segun Pieters, ta duna peso y credibilidad adicional na e conclusionnan.
Despues di tres aña di trabou (2023-2026), e evaluacion ta mustra progreso real den diferente area di reforma gubernamental, mientras cu e paisnan a conserva nan espacio pa tuma nan decisionnan propio.
Aruba a demostra cu e por
Pieters a enfatisa cu e resultado aki tambe ta un reconocemento na e profesionalnan y funcionario publico cu durante e añanan a traha riba implementacion di e reformanan. “Nos tin motibo pa sinti orguyo. Nos ambtenaarnan, nos profesionalnan y nos institucionnan a demostra cu Aruba tin capacidad pa modernisa y mehora su maneho, sin cu otro mester tuma control di nos proceso,” el a expresa. Segun Pieters, e resultado positivo ta mustra cu confianza den nos propio capacidad institucional no tabata un riesgo, sino un inversion.
Un mensahe cu ta relevante awe mas cu nunca
Pa fraccion di PPA, e evaluacion aki tin un significado, cu ta bay mas leu cu e Landspakket mes. Esaki ta mustra cu reforma y autonomia no ta contrario di otro. Aruba por modernisa, fortalece gobernacion y mehora su institucionnan den un forma duradero, sin sacrifica su posicion constitucional. “Awe nos por mira cu e caminda di colaboracion, responsabilidad y autonomia a duna resultado. Aruba a demostra cu reforma duradero ta posibel sin Rijkswet,” Pieters a conclui.
Pa PPA, e evaluacion positivo aki no ta solamente un resultado tecnico. Ta un prueba cu Aruba por avansa, cambia y fortalece su futuro, mientras cu e ta mantene control riba su propio destino.
