Parlamentario ing. Carlos Bermudez ta conoce Hospital Internacional de Colombia na Bucaramanga

Parlamentario ing. Carlos Bermudez a bishita recientemente Hospital Internacional de Colombia (HIC) na Bucaramanga, Santander, pa conoce mas di cerca e tratamento, tecnologia y servicionan medico specialisa cu e institucion ta ofrece, teniendo na cuenta cu hopi ciudadano Arubiano ta wordo referi na HIC pa ricibi tratamento medico.

E contacto inicial cu e institucion a surgi despues cu Bermudez a ricibi un invitacion di ProColombia pa participa na e evento “Santander Llega a Aruba”, cu a tuma lugar dia 2 di juli ultimo na Iberostar Aruba. Durante e encuentro, e parlamentario a sostene combersacion cu diferente representante di Hospital Internacional de Colombia.

Probechando un bishita posterior na Bucaramanga, Bermudez a coordina un bishita inoficial na e hospital pa conoce personalmente su facilidadnan y amplia su conocemento tocante e cuido cu pacientenan Arubiano ta ricibi na e institucion.

Durante e bishita, Bermudez a reuni cu Dr. Víctor Raúl Castillo Mantilla, CEO di HIC; María Camila Serrano, Directora di Negocio Internacional; Dr. Evaristo José Vega Fernández, Vicepresidente di Salud FCV, y Laura Miranda, Hefe di Operacionnan Internacional.

E parlamentario a ricibi un splicacion amplio tocante e diferente tratamentonan, examennan y servicionan medico cu HIC ta ofrece. Tambe el a haya informacion tocante HIC Cardiovascular, un centro altamente specialisa den operacionnan di curason y otro procedimentonan cardiovascular.

Un di e aspectonan cu mas a impresiona Bermudez tabata e informacion cu, un dia prome cu su bishita, HIC a logra realisa cu exito un operacion di curason asisti pa robot. Segun e splicacion ricibi, e ciruhano cu a dirigi e operacion tabata fisicamente na New Delhi, India, mientras cu e pashent tabata na Bucaramanga, Colombia, na un distancia di aproximadamente 15.000 kilometer.

E procedimento a wordo realisa mediante un conexion di fibra optico cu ta permiti supera e distancia geografico. Ademas, e sistema ta conta cu un conexion di reserva pa garantisa cu e operacion por continua sin interupcion den caso di un eventual fayo tecnico.

Riba di tres dia di su estadia, Bermudez a participa na un recorido completo di Hospital Internacional de Colombia. Guia pa Laura Miranda, el a conoce e area di recepcion pa pashentnan internacional, e diferente tipo di habitacionnan, e piso di oncologia y otro departamentonan importante di e institucion. Tambe el a bishita e edificio di HIC Cardiovascular.

Na final di e bishita, parlamentario ing. Carlos Bermudez a expresa cu el a keda sumamente impresiona cu e nivel di tecnologia, innovacion, infrastructura y calidad di cuido medico cu HIC ta ofrece.

“Ta importante pa Aruba sigui fortalece relacionnan cu institucionnan medico di e caliber aki, teniendo na cuenta cu hopi Arubiano ta depende di tratamento specialisa den exterior. Conoce personalmente e facilidadnan y dialoga cu e profesionalnan ta yuda nos comprende miho e experiencia y necesidadnan di nos pashentnan,” Bermudez a expresa.

E parlamentario a gradici e directiva y henter e team di Hospital Internacional de Colombia pa e apertura, hospitalidad y informacion comparti durante su bishita.

“Salud ta nos mayor rikesa,” Bermudez a conclui.