Parlamentario Jennifer Arends-Reyes: Cuminsando e luna aki finalmente maestronan ta conoce aumento salarial

Parlamentario Jennifer Arends-Reyes a expresa su satisfaccion pa cu e aprobacion reciente di un aumento salarial pa maestronan, un paso importante den e mehoracion di e sistema educativo y e reconocemento mereci pa e profesionalnan cu ta forma nos mucha y hobennan. 

Segun Arends-Reyes, e decision pa implementa e aumento salarial ta manda un mensahe cla: e pais ta reconoce e rol esencial cu maestronan ta hunga den desaroyo di mucha y den progreso di comunidad. “Maestronan ta wes’i lomba di nos sistema educativo. Inverti den nan ta inverti den progreso y generacionnan di nos pais,” Arends-Reyes a declara. Pa 2026 gobierno di AVP-Futuro a aloca 9,3 miyon y pa 2028, un total di 16 miyon florin. 

E parlamentario a indica cu pa hopi tempo, maestronan a biba cu e presion y carga e peso pa brinda e miho ambiente posibel di enseñanza na e muchanan. Tanto den klas, manera den preparacion administrativo, sin cu nan esfuerzo a wordo recompensa den transcurso di hopi aña. 

E aumento salarial ta un paso den e direccion corecto pa motiva, retene y atrae talento nobo pa e sector educativo. Sra. Arends-Reyes mes a presenta un mocion pa asina no warda mas cu introduccion y yega na un aumento salarial pa maestronan. 

Arends-Reyes a enfatisa cu no mester mira e aprobacion como un punto final, sino mas bien como parti di un proceso mas amplio pa fortalece educacion. “Aumenta salario ta importante, pero nos mester sigui traha riba mehoracion di condicionan di trabou, formacion continuo y recurso humano pa sostene nos maestronan,” el a bisa.

E parlamentario tambe a mustra su aprecio pa e dialogo constructivo entre gobierno, parlamento y representantenan di e sector educativo cu a haci posibel e logro aki y ta keda pendiente di fase 2. Segun Arends-Reyes, colaboracion ta clave pa logra reformanan duradero cu ta beneficia tanto maestronan como alumnonan.

Finalmente, Jennifer Arends-Reyes a reitera su compromiso di sigui defende interes di educacion den parlamento. “Nos mester sigui pone educacion riba e agenda nacional. Un pais cu ta inverti den su maestronan ta un pais cu ta scoge progreso, igualdad y oportunidad pa tur su ciudadano,” el a conclui.