Parlamentario John Hart: Sosten unanime pa ley cu ta aumenta castigo pa automobilista iresponsabel: Algo cu no mester a tarda tanto pa concretisa

Den su calidad como Parlamentario di AVP y Presidente di e Comision di Husticia, John Hart a enfatisa importancia di fortifica nos cuadro legal, den hopi aspecto, incluyendo siguridad di trafico. E siman aki, na momento cu, unanimamente a aproba e ley cu ta aumenta castigo pa casonan di ‘hit & run’, e parlamentario a comparti un enfoke critico pero constructivo riba e proceso legislativo y e responsabilidad comparti di Parlamento pa haci mas y miho.

“Ora nos ta papia di siguridad di trafico, no ta solamente cuestion di tin leynan riba papel. Un parti fundamental ta comportacion di automobilistanan,” Hart a expresa. Segun e parlamentario, den nos sociedad ainda tin un cultura unda e consumo di uno, dos, tres of mas cerbes no ta mira como obstaculo pa bay tras di stuur. “Nos mester evalua si nos legislacion ta cubri e realidad aki di forma suficiente y efectivo,” el a agrega.

Ademas di esaki, Hart a señala e preocupacion riba vehiculonan right-hand drive, cu pa motibo di infrastructura local por presenta limitacion di bista y angulo, creando situacionnan potencialmente peligroso riba caminda. “Infrastructura di nos pais no a wordo diseña pa e tipo di vehiculo aki. Esaki mester forma parti di nos analisis integral riba siguridad vial.”

Otro punto crucial ta handhaving. Refiriendo na e comentario di Raad van Advies, Hart a cuestiona cuan efectivo un aumento di castigo por ta si no tin e capacidad suficiente pa controla y impone esaki. “Si nos ta aumenta castigo sin fortalece control y capacidad di imposicion, nos mester pregunta nos mes kico lo ta e impacto real cu esaki lo tin,” el a indica. El a reconoce cu capacidad di cuerpo policial ta un factor importante, pero tambe a enfatisa cu tin otro instrumentonan y mecanismonan cu Parlamento por explora pa yuda fortalece su cumplimento.

Tocante e aumento alarmante di caso di hit & run, Hart a recorda cu e iniciativa legislativo cu a trata y aproba e siman aki ta data for di 2019. “Hit & run no ta un problema di awe. Ta un fenomeno cu a bin crece aña tras aña. E pregunta legitimo ta: dicon e ley aki a tarda casi ocho aña prome cu a aproba?”

Hart a señala cu e reflexion aki no ta pa apunta dede, pero pa saca cierto enseñansa institucional. “Nos como Parlamento mester ta autocritico. Kico nos por a haci diferente? Con nos por evita cu leynan importante ta keda den lachi? Legislacion mester responde na e realidad di nos comunidad na momento oportuno, no despues cu problema a escala.”

Como Presidente di e Comision di Husticia, Hart a enfatisa cu e proceso di e ley aki a mustra algo positivo: Parlamento ta capaz di traha crusando e liña partidario ora bienestar general ta na prome luga. “Siguridad di nos comunidad no tin color politico. Ora tin iniciativa cu ta sirbi interes general, nos ta yega na consenso y traha hunto. Nos kier tambe felicita tur esunnan cu a impulsa y sostene e iniciativa aki for di 2019 te su aprobacion.”

Finalmente, Hart a reitera cu e compromiso di Parlamento ta pa sigui fortalece su funcion legislativo, cu mas rapidez, mas efectividad y siempre cu e bienestar di comunidad como guia central.

“Nos ta traha pa un Aruba mas sigur. Y esaki ta un responsabilidad comparti, tanto di ciudadano como di legislador.”