Den e programa “Interes di Pueblo” diasabra ultimo, Parlamentario Rocco Tjon di fraccion di MEP a elabora riba e traspaso di gobierno recien, cual el a califica como un momento historico di transparencia y eficiencia. Tjon a destaca cu e dia di traspaso tabata uno largo, pero sumamente productivo, caminda pa prome biaha, ministernan saliente a reuni cu nan sucesornan pa un entrega detaya di responsabilidadnan.
Tjon a resalta cu e traspaso no tabata limita na un simple splicacion di trabou realiza, pero a inclui entrega di tur documento relevante, mapanan, ordennan, y dossiernan. Cada minister a sinta personalmente cu su contraparte, brindando conseho y facilitando tur material necesario pa continuidad di trabou. Esaki a sigura cu e ministernan nobo por a cuminsa traha di inmediato, sin interupcion.
Ademas, a entrega tur oficina completamente ekipa, incluyendo tur ekipo necesario. Tjon a enfatisa cu e esfuerso aki no solamente a beneficia e ministernan nobo, pero tambe departamentonan gubernamental, fundacionnan, y en special, e comunidad di Aruba. E traspaso meticuloso, resultado di simannan di preparacion, ta un ehempel di compromiso cu servicio publico eficiente y transparente.
